Aqtaýda 113 mln jyl buryn ómir súrgen ıhtıozavrdyń qańqasy tanystyryldy
Sý janýarynyń súıegi maýsym aıynda Mańǵystaý aýdanynan tabylǵan. Ol buryn Tetıs muhıtynda ómir súrgen.
Sý janýarynyń qańqasyn maýsym aıynda Mańǵystaý aýdany, «Sýlyqapy» shatqalynan áýesqoı paleontolog Vladımır ıArtsev tapqan. Maýsym aıynda Mańǵystaý oblystyq mýzeı qyzmetkerleri, M. Ótemisov atyndaǵy Batys Qazaqstan ýnıversıtetiniń mamandary Reseıden kelgen paleontolog, ıhtıozavr jónindegi maman V. M. Efımovtyń qatysýymen qumdy alqaptaǵy súıek qaldyqtaryn qazyp alý jumystaryn júrgizgen.
Tabylǵan qaldyqtar mýzeımen kelisim boıynsha Oral qalasyna 3 aı merzim ishinde preparattaýǵa jiberilgen.
«Oralda paleontolog Jámıla Jaqypova súıekterdi arnaıy qospalarmen óńdep, tabylǵan bólshekterdiń árbiriniń gıpstelgen kóshirmesin jasap shyqty. Osylaısha, ejelgi tirshilik ıesiniń eki kóshirmesi jasaldy, biri – mýzeıge, biri – ýnıversıtetke qaldyryldy», - deıdi tabıǵat bóliminiń mamany Darıǵa Amanııazova.
