Aqtaýda 11 eldiń sheberi qoıdyń júninen tekemet basyp shyǵardy
AQTAÝ. KAZINFORM — Olar týyndyny «Aqtaý -Túrki áleminiń mádenı astanasy» jylyna arnap jasady.
Tekemet — qoıdyń kúzem júninen basylǵan kıizge oıý-órnek salynǵan tósenish. Ol turmysqa arnalǵan buıym ǵana emes, túrki halyqtarynyń bolmysyn, salt-dástúrin kórsetetin óner týyndysy. Ony sheteldik qolóner sheberleri birge jasap, birlik pen baýyrlastyqty tanytty.
— Tekemettiń ár órnegi — júrekten shyqqan mura, ár ıirimi — urpaqqa arnalǵan amanat. Biz aldymen qoıdyń kúzem júnin daıyndap, kıiz bastyq. Sodan soń onyń betine oıý-órnegimizdi qoıdyq. Tekemetti qaq ortasyna «Aqtaý — Túrki áleminiń mádenı astanasy» jobasynyń logotıpin ornalastyrdyq. Bireýimiz bir jaǵynan órnegin salsaq, endi birimiz logotıptiń detaldaryn tolyqtyrdyq. Qoldan jasaǵan týyndy túrki halyqtary birliginiń nyshany ispettes, — deıdi Túrikmenstan Respýblıkasynyń dızaıneri Aına Dýrdylyıeva.
«Dalamen úndes baba óner» atty halyqaralyq festıvalge shet elderden 15, Qazaqstan boıynsha 30 sheber qatysty. Olardyń arasynda túrikmenstandyq Aına Dýrdylyıeva, Qyrǵyzstandyq Asyljan Qambarova, Ózbekstandyq Nargıza Mýsajanova, Mońǵolııalyq Sývd Banzragch sııaqty ataqty dızaınerler bar. Al, qazaqstannan «Jadaǵaı», «Masaqova», «Nurshah», «Tárbııa» sán úıleriniń toptamalary kórsetildi. Saltanatty sharaǵa TÚRKSOI halyqaralyq uıymynyń bas hatshysy Sultan Raev qatysyp, bul sharanyń elder arasyndaǵy yntymaqtastyqtyń arqasynda júzege asyp jatqanyn aıtty.
— Kaspıı teńiziniń jaǵasynda eki kún boıy erekshe mádenı kezdesýdiń kýási boldyq. Dala rýhyn zamanaýı úlgimen ushtastyrǵan bul sán toptamalary tek kıim nemese qolóner buıymy ǵana emes, ortaq bolmysymyzdyń, ótkenimiz ben keleshegimizdiń sımvolyna aınaldy. TÚRKSOI uıymy retinde biz ortaq mádenı muramyzdy dáripteýdi ári osyndaı jobalarǵa qoldaý kórsetýdi jalǵastyra beremiz. Árıne, mundaı ıgi sharalar tyǵyz yntymaqtastyqtyń arqasynda júzege asyp jatyr. Aldaǵy ýaqytta da birlesken jobalardy júzege asyra bermekpiz, — deıdi TÚRKSOI halyqaralyq uıymynyń bas hatshysy Sultan Raev.
Buǵan deıin, TÚRKSOI uıymynyń bas hatshysy Sultan Raev Aqtaýda 30 ǵa jýyq aýqymdy mádenı is-shara ótetinin aıtqan edi.