Aqtaýda 100-ge jýyq kópqabatty úıge 3D sýretter salynady
ASTANA. QazAqparat - Aqtaý qalasynyń 55 jyldyǵyna oraı, shahar kelbeti kórkeıe túspek. Atap aıtqanda, kópqabatty 97 turǵyn úıdiń syrty boıalyp, 3D sýretter salynady, dep habarlaıdy Qazaqparat tilshisi. Bul týraly qalalyq ákimdikte ótken jıynda Aqtaý qalalyq sáýlet jáne qala qurylysy bóliminiń ınspektory málimdedi.
Ertegidegi keıipkerler, anımatsııalyq fılm qaharmandary, tabıǵattyń ásem kórinisi - osynyń bári jýyrda qaladaǵy 97 úıdiń qabyrǵasynda beınelenedi. Joba avtorlarynyń aıtýynsha, erekshe sýretterdi 4 elden kelgen qylqalam sheberleri salady. ¤
«Qazaqstan, Qyrǵyzstan, Ýkraına, Reseı elinen street-art sýretshiler kelip, 10 kún boıy salady. Jumystar shilde aıynda bastalady. Ár sýrettiń 10 jylǵa kepildigi bar», - deıdi Aqtaý qalalyq sáýlet jáne qala qurylysy bóliminiń ınspektory Daler Nýrýlaev. 
4-shaǵyn aýdannan bastap «Samal» shaǵyn aýdanyna deıingi úıler tańdap alynǵan. Sýretterdiń eskızi sýretshilerge aldyn ala jiberilgen. Arnaıy boıaýlary da alynǵan.
«Mańǵystaý oblysynyń tabıǵaty topyraqty, ystyq jel soǵyp turady. Bannerler shydamaıdy. Óńi ketedi nemese qurǵap qalady. Sondyqtan osyndaı sýretter salý tıimdi dep oılaımyz. Bastama «Aqtaý serpini» joba aıasynda iske asady», - deıdi ol.
Biregeı bastama óńir qazynasyna shyǵyn ákelmeıdi. Kásipkerler qoldap, seriktestikter qarajat bóledi. Jumys qurylys kompanııalarynyń esebinen atqarylady. Qalaǵa qoldaý kórsetý boıynsha tıisti hattar 40 kompanııaǵa joldandy. ¤Qazirgi kezde 24 mekeme syrlaý-boıaý jumystaryn bastaýǵa daıar.
