Aqtaýda 100-ge jýyq áskerı qyzmetshi baspanaly boldy

AQTAÝ. QazAqparat - Aqtaý qalasyndaǵy áskerı qalashyqta 96 páterden turatyn 4 turǵyn úıdiń qurylysy aıaqtaldy. Áskerı qyzmetshilerge páter kilti saltanatty túrde tabys etildi, dep habarlaıdy QazAqparat Qorǵanys mınıtsrligine silteme jasap.

Turǵyn úıler áskerı qalashyqtardy damytý baǵdarlamasy aıasynda tez salynatyn úılerdiń jeke jobasy boıynsha salynǵan. Páterler tolyǵymen jabdyqtalǵan jáne turýǵa daıyn. Atap aıtqanda ádemi árleý, sanıtarlyq tehnıka qurylyp, qajetti jıhaz jáne turmystyq tehnıkamen qamtylǵan. Turǵyn úıge qarasty aýmaq abattandyrylǵan. Aımaq boıynsha jaryq júrgizilip, asfalt tóselip, aýlada sporttyq alań, balalarǵa arnalǵan oıyn alańqaılary men oryndyqtar ornatylǵan.

«Áskerı qyzmetshilerdiń áskerı qalashyqqa kóshýi bólimshelerdiń jumyldyrý jáne jaýyngerlik daıarlyǵyna oń septigin tıgizedi. Atap aıtqanda, turaqty jaýyngerlik daıarlyq bólimshelerine jatatyndar - teńiz jaıaý áskerleri men áýe qorǵanysyna qarsy kúshter. Odan basqa, qyzmettik páterdi alǵan áskerı qyzmetshiler aǵymdaǵy turǵyn úı tólemderiniń 50% kólemdegi mólsherin alýdy jalǵastyryp, jınaǵyn tolyqtyra alady. Áskerı qyzmetshilerdiń balalary úshin mektepke aparyp-ákelý jáne balabaqsha bolady» delingen habarlamada.

Qazirgi kezde Qazaqstan Qarýly Kúshterinde qyzmettik turǵyn úı qorynyń qurylysy - mańyzdy máseleniń biri. Turǵyn úıdi jalǵa alý múmkindigi shekteýli alystaǵy garnızondarda qurylys júrgizýge basymdyq beriledi.

Qyzmettik turǵyn úı áskerı qyzmetshi men onyń otbasyna qolaıly jaǵdaı jasaýǵa múmkindik beredi.