Aqtaýda 100-den asa áskerı teńizshi 10 shaqyrymǵa júgirdi
QR Qarýly kúshteriniń 100-den astam áskerı teńizshisi Kaspıı teńizi jaǵalaýynda 10 shaqyrymdy eńserdi, dep habarlaıdy Kazinform.
QR Qarýly kúshteri áskerı-teńiz kúshteri bas qolbasshysynyń orynbasary Jumabek Hasenovtyń aıtýynsha, is-shara 2024 jylǵy daıyndyqty bastaý aıasynda jáne Prezıdentti qoldaý maqsatynda júzege asyrylǵan.
- 3 qańtar kúni Prezıdentimiz Qasym-Jomart Kemeluly Toqaev «Egemen Qazaqstan» gazetine bergen suhbatynda «Elimizdiń tutastyǵy jáne Otanymyzdy qorǵaý —eń úlken maqsat» degen edi. Osy maqsat aıasynda týǵan elimizdiń qaýipsizdigin qamtamasyz etý jáne Prezıdentimizdiń tapsyrmasyn oryndaýǵa biz árqashan daıynbyz. Ár jaýynger óz emtıhanyn tapsyrdy. Qarýdy qalaı meńgerý kerek, teńizge qalaı shyǵý qajet jáne teńiz desanttyq operatsııalardyń júrgizilý tártibin kórdi. Qazirgi tańda áskerimiz elimizdi, jerimizdi qorǵaýǵa daıyn ekenine kóz jetkizdik, - dedi Jumabek Hasenov.
Áskerı teńizshiler tártip boıynsha 50 mınýtta 10 shaqyrymdy eńserýi tıis bolǵan. 100-den astam sarbaz «Samal» shaǵynaýdan mańynan bastap tıisti shaqyrymdy ýaqytynda júgirip ótti. Komendanttyq rota matrosy - Rýffat Muratov Pavlodar qalasynan kelgen. Áskerge egizi Rıshad Muratovpen birge shaqyrtylǵan. Rýffat búginde áskerı qyzmetin oıdaǵydaı ótep jatqanyn aıtady.
- Biz 2023 jyly áskerı qyzmetke keldik. Áskerı qyzmet óte jaqsy ótip jatyr. Jańa jeke daıyndyq kýrsynan óttik. Ádette bundaı daıyndyqtar ishte ótkiziledi. Biz Bas Qolbasshy men Qorǵanys mınıstriniń kez-kelgen komandasy men buıryǵyn oryndaýǵa daıynbyz, - deıdi Rýffat Muratov.
2024 jylǵa áskerı teńizshiler birqatar is-sharany ótkizýdi josparlap otyr.
- Shilde aıynda «Kaspıı mańynda birlestik-2024» atty oqý jattyǵýy ótedi. Atalǵan oqý jattyǵýǵa Reseı, Túrkmenstan, Ázerbaıjan, Ózbekstan, Qyrǵyzstan eliniń áskerleri kelip, Kaspıı mańyn qorǵaý maqsatynda birlesip oqý jattyǵý ótkizemiz, - dedi Jumabek Hasenov.
