Aqtaýda 10 jyl boıy salynǵan turǵyn úıdiń qurylysy aıaqtaldy
AQTAÝ. QazAqparat - Aqtaýda 2008 jyly qurylys bastalǵan «Aqqý 1» turǵyn úı kesheni paıdalanýǵa beriledi, dep habarlaıdy Qazaqparat.
Kópqabatty turǵyn úıdiń qurylysy on jyl buryn bastalǵan. Alaıda 2012 jyly qurylystan aqaý shyǵyp jumys toqtaǵan. Sebebi qurylysqa qoldanylǵan jabyndylardyń jaramsyzdyǵy anyqtalǵan. Araǵa tórt jyl salyp úsh merdiger qurylys jumystaryn qaıta bastady.
Mańǵystaý oblysy Memlekettik sáýlet qurylys baqylaý basqarmasy basshysynyń mindetin atqarýshy Eldar Mashyryqovtyń aıtýynsha, paıdalanylǵan arajabyndy plıtalar maıysyp qurylys toqtatylǵan.
Turǵyn úı kesheninde 650-ge jýyq páter bar. Osy aıdyń sońynda 300-den astam páter paıdalanýǵa berilmek. Al qalǵan 300 páterdi osy jyly 1 qyrkúıekke deıin berý josparlanǵan.
«Qurylysy uzaqqa sozylǵan «Aqqý» turǵyn úı keshenin paıdalanýǵa berý - oblys ákiminiń basty tapsyrmalarynyń biri. Onyń 5 jylynda nysanda eshqandaı qurylys jumystary júrgizilmedi. Buryn bul úıdiń tóńireginde týyndaǵan máselelerge qatysty kúdikti joıý úshin «Qazaq qurylys jáne sáýlet ǵylymı-zertteý jáne jobalaý ınstıtýtynan» mamandar shaqyrylyp, tekserý júrgizildi. Olar keshenniń paıdalanýǵa jaramdy ekenin rastap, jazbasha anyqtama berdi. «Aqqý-1» tolyqqandy keshenge aınalady»,- dedi oblys ákiminiń birinshi orynbasary Serik Amanǵalıev.
