Aqtaý–Beıneý tasjolyndaǵy jol apatynan tórt adam mert boldy
AQTAÝ. KAZINFORM –Mańǵystaý oblysynda Aqtaý–Beıneý tasjolynda eki Toyota Camry kóligi soqtyǵysyp, tórt adam qaza tapty. Taǵy tórt adam jaraqat alyp, aýrýhanaǵa jetkizildi.
Jol apaty 16 qyrkúıek kúni saǵat 20:30 shamasynda bolǵan. Aldyn ala málimet boıynsha, Jetibaı aýylynan Shetpe aýyly baǵytynda kele jatqan Toyota Camry jol ústinde júrgen túıeni qaǵyp ketken. Soqqydan keıin kólik qarsy baǵyttaǵy jolaqqa shyǵyp, qarsy kele jatqan ekinshi Toyota Camry kóligimen soqtyǵysqan.
Apat saldarynan tórt adam alǵan jaraqatynan oqıǵa ornynda kóz jumdy. Taǵy tórt adam túrli dene jaraqatymen medıtsınalyq mekemege jetkizildi.
Mańǵystaý oblystyq kópbeıindi aýrýhanasynyń málimetinshe, aýrýhanaǵa zardap shekken úsh adam jetkizilgen. 1986 jyly týǵan naýqasqa bas mıynyń oshaqty jaraqaty, al 2004 jyly týǵan patsıentke birneshe dene jaraqaty dıagnozy qoıylǵan. Ekeýi de jansaqtaý bólimine jatqyzylyp, jaǵdaıy aýyr dep baǵalanyp otyr.
1996 jyly týǵan taǵy bir zardap shegýshi birneshe dene jaraqatymen travmatologııa bólimine jatqyzylǵan. Onyń jaǵdaıy turaqty, dárigerler baqylaýynda.
Atalǵan derek boıynsha Qylmystyq kodekstiń 345-babynyń 4-bóligi boıynsha qylmystyq is qozǵaldy. Eki kólik te arnaıy turaqqa qoıylyp, qajetti saraptamalar taǵaıyndalǵan. Qazir polıtsııa jol apatynyń barlyq mán-jaıyn anyqtap jatyr. Sonymen qatar jolǵa shyqqan túıeniń ıesi izdestirilip jatyr.
Buǵan deıin, Aqtóbede úsh kólik soqtyǵysyp, júrgizýshi kóz jumǵan edi.
