Aqtaý jylý berý maýsymyna daıyn ba
AQTAÝ. KAZINFORM – Aqtaýda 2026–2027 jyldardaǵy jylytý maýsymyna daıyndyq jumystary jalǵasyp jatyr. Qaladaǵy qazandyqtar men negizgi jylý kózderi josparly jóndeýden ótip, jylý jelilerindegi anyqtalǵan aqaýlar kezeń-kezeńimen joıylýda. Degenmen ınjenerlik jelilerdiń tozý deńgeıi joǵary bolǵandyqtan, jekelegen ýchaskelerdegi jóndeý jumystary jylytý kezeńinde de jalǵasýy múmkin.
«Kaspıı jylý, sý arnasy» MKK málimetinshe, kásiporynnyń qaramaǵynda 9 blokty-modýldi jáne 1 ortalyq qazandyq bar. Olarda josparly jóndeý jáne tehnıkalyq tekserý jumystary júrgizilip, negizgi jabdyqtardyń daıyndyǵy qamtamasyz etilgen.
Jylytý jelileriniń jalpy uzyndyǵy – 469,9 shaqyrym. Onyń tozý deńgeıi 65 paıyzdy quraıdy. Bıyl jyl basynan beri jylý jelilerinde 247 aqaý anyqtalyp, onyń barlyǵy joıylǵan. Sonymen qatar 15–17 qyrkúıek aralyǵynda júrgizilgen gıdravlıkalyq synaq kezinde taǵy 39 aqaý anyqtaldy. Onyń 30-y boıynsha jóndeý aıaqtalǵan, qalǵan 9 ýchaskede jumystar jalǵasyp jatyr.
Kásiporyn ókilderiniń aıtýynsha, bul jaǵdaı qalanyń jylytý maýsymyna daıyn emestigin bildirmeıdi. Kerisinshe, gıdravlıkalyq synaqtardyń negizgi maqsaty – álsiz ýchaskelerdi aldyn ala anyqtap, maýsym bastalǵanǵa deıin múmkindiginshe qalpyna keltirý.
Budan bólek, Aqtaýda ortalyqtandyrylǵan jylýmen jabdyqtaý júıesine qosylǵan 1198 kóppáterli turǵyn úı bar. 28 qyrkúıektegi jaǵdaı boıynsha 510 úıde ishki jylý júıelerin shaıý, gıdravlıkalyq synaý jáne tekserý jumystary júrgizilgen. 207 turǵyn úı daıyndyq aktisin alǵan.
Áleýmettik nysandardyń daıyndyǵy da tekserilip jatyr. Mektepke deıingi uıymdar men jalpy bilim beretin mektepterdiń 100 paıyzy daıyndyq aktilerin alǵan. Medıtsınalyq uıymdardyń daıyndyq kórsetkishi – 98 paıyz.
Sonymen birge qaladaǵy jylý ınfraqurylymyn jańǵyrtý jumystary júrgizilýde. Bıyl 8-shaǵynaýdanda uzyndyǵy 1,64 shaqyrym jylý jelisi aýystyryldy. Al 4 jáne 5-shaǵynaýdandardaǵy jylý jelilerin qaıta jańǵyrtýdyń ekinshi kezeńi bastaldy. Joba 2026–2027 jyldarǵa josparlanǵan.
Kásiporyn jylytý maýsymynda bolýy múmkin avarııalyq jaǵdaılarǵa da daıyndyq júrgizip jatyr. Apattyq-qalpyna keltirý jumystaryna qajetti qubyrlar, ysyrmalar men qosalqy bólshekter qory jasaqtalýda. Arnaıy tehnıka men táýlik boıy jumys isteıtin avarııalyq brıgadalardyń daıyndyǵy qamtamasyz etilgen.
Oblysta jylý berý maýsymy syrtqy aýanyń ortasha táýliktik temperatýrasy úsh kúntizbelik kún qatarynan +8°C-tan tómen bolǵan kezde bastalady. Al, Aqtaý qalasynda jylýmen jabdyqtaýdy qosýdyń josparly merzimi - 15 qazan.
Buǵan deıin, Tarazdaǵy 1 439 kóppáterli úıge jylý 12 qazannan berile bastaıtynyn jazǵan bolatynbyz
