Aqtaý jańa jyldyq bezendirýge 13 mln teńge jumsamaq
AQTAÝ. QazAqparat - Aqtaýdy Jańa jyldyq bezendirýge 13 mln teńgeden astam qarjy bólý josparlanýda. Bul týraaly Lada.kz Aqtaý turǵyn úı-kommýnaldyq sharýashylyq bóliminiń basshysy Berik Іzǵalıevke silteme jasap habarlady.
Merdiger kompanııany anyqtaý úshin konkýrs jarııalandy. Konkýrsqa 2017 jylǵy 19 qarashaǵa deıin ótinishter qabyldanady.
Berik Іzǵalıevtiń aıtýynsha, jańa jyldyq bezendirýge aqtaýlyqtar Táýelsizdik kúninen keıin kirisedi. Konkýrs jeńimpazy jeltoqsannyń basynda anyqtalady.
Osy maqsatta bıýdjetten 13 mıllıon 901 myń 785 teńge qarastyrylyp otyr. Tehnıkalyq sıpattamaǵa sáıkes, merdiger kompanııa 20 jeltoqsanda iske kirisip, úsh kún ishinde «Yntymaq» jáne «Astana» alańdaryn, sondaı-aq oblystyq ákimdik pen «Qazaqtelekom» ǵımaratynyń aldyndaǵy alańdy bezendirýi tıis.
12 metrlik eki shyrsha «Yntymaq» jáne «Astana» alańdaryna qoıylady. «Yntymaq» alańyndaǵy 714 metrge sozylyp jatqan butalar, 100 boz arsha jáne 326 túp aǵash jaryq dıodty gırlıandalarmen kómkeriledi. Oblystyq ákimdik pen «Qazaqtelekomnyń» mańyndaǵy jáne «Astana» alańyndaǵy butalar men aǵashtar da gırlıandalarmen, kestelermen, jyltyraýyq shamdarmen bezendiriledi. «Astana» alańyndaǵy «Karavella» monýmenti 738 jaryq dıodty gırlıandamen áshekeılenedi, sondaı-aq «Aqbota» parkin de jaryq dıodty shamdarmen bezendirý josparlanyp otyr.
