Aqtaý-Úrgenish arasynda aptasyna 3 ret ushaq qatynaı bastady

NUR-SULTAN. QazAqparat - Bıyl alǵashqy ret Aqtaý men Ózbekstannyń Úrgenish qalalary arasynda aptasyna 3 ret jıilikpen qatynaıtyn turaqty reıs iske qosyldy, dep habarlaıdy QazAqparat.

Bul týraly Mańǵystaý oblysynyń ákimi Nurlan Noǵaev Ózbekstan Respýblıkasynyń Aqtaý qalasyndaǵy Bas konsýly Atabek Tursynbekovti qabyldaý kezinde aıtty.

«Ózbekstan Respýblıkasy men Mańǵystaý oblysy arasyndaǵy syrtqy saýda aınalymy byltyr 7,9 mln AQSh dollaryn qurady. Onyń ishinde eksport 672,6 myń dollar bolsa, ımport – 7,3 mln dollar. Mańǵystaý oblysynda ekonomıkanyń túrli salalarynda ózbek kapıtalynyń qatysýymen 84 kásiporyn tirkelgen. Áýe qatynastaryn damytý maqsatynda osy jyly alǵashqy ret Aqtaý jáne Úrgenish qalalary arasynda aptasyna 3 ret jıilikpen qatynaıtyn turaqty reıs iske qosyldy. Sonymen birge, aptasyna 3 ret Aqtaý-Nókis qalalary arasynda turaqty reıs bar», - dedi Nurlan Noǵaev.