Aqtaý úkimin shyǵarýdy suraımyn — eks-vıtse-mınıstr Erlan Qojaǵapanov

ASTANA. KAZINFORM — Elorda soty burynǵy Mádenıet jáne sport vıtse-mınıstri Erlan Qojaǵapanovtyń ústinen qozǵalǵan qylmystyq is boıynsha apellıatsııalyq shaǵymdy qaraýdy jalǵastyryp jatyr.

Búgin sot otyrysynda úsh jylǵa bas bostandyǵynan aıyrylǵan eks-sheneýnikten jaýap alyndy. 

Onyń aıtýynsha, burynǵy vıtse-mınıstrge qatysty eki aıyptaý aktisi daıyndaldy, birinshisi jeltoqsan aıynda, ekinshisi sáýirde. Alaıda ekinshi qujattan qatań tujyrym alynyp tastalǵan. 

— Prokýrorlar meniń áreketimnen baıý maqsatyndaǵy qylmystyq nıet bolmaǵanyn baıqaǵan shyǵar dep oılaımyn, — dedi Erlan Qojaǵapanov sot aldynda.

Sondaı-aq ol qylmystyq is materıalynda usynylǵan aıǵaqtardyń jıyntyǵy onyń kinásin rastamaıtynyn, al áreketi sol kezde atqarǵan qyzmetine sáıkes bolǵanyn jáne ókilettiginen aspaǵanyn aıtyp otyr.

— Apellıatsııalyq alqadan 2025 jylǵy 19 mamyrda Astana qalasynyń aýdanaralyq qylmystyq soty shyǵarǵan maǵan jáne Lázzat Kókkózovaǵa qatysty zańsyz úkimdi joıýdy jáne bizdiń áreketimizde qylmys quramynyń bolmaýyna baılanysty aqtaý úkimin shyǵarýdy suraımyn, — dep túıindedi burynǵy vıtse-mınıstr.

Eske salaıyq, byltyr 1 naýryzda Sybaılas jemqorlyqqa qarsy qyzmet Mádenıet jáne sport eks-vıtse-mınıstrin aýyr jemqorlyq qylmys jasady degen kúdik boıynsha ustady.

Antıkordyń aqparatynsha, ol 2018 jyly Petropavl qalasynda Qazaqstan Respýblıkasy men Reseı Federatsııasynyń XV óńiraralyq yntymaqtastyq forýmynyń kórmesin uıymdastyrý boıynsha shart jasasýdy qoldaǵan.

Bıyl mamyrda burynǵy vıtse-mınıstr Erlan Qojaǵapanovǵa qatysty sot úkimi shyqty. 

Al tamyzda Erlan Qojaǵapanovtyń úkimine shaǵym túsirildi.