Aqtaý túrmesiniń qarýly qashqyndary jónindegi teleserıal túsirildi
ASTANA. QazAqparat - Naýryz aıynda «Habar» telearnasynan 2010 jyly Aqtaý túrmesinen qylmyskerlerdiń qashýyna qatysty túsirilgen teleserıal kórsetiledi, dep habarlaıdy QazAqparat tilshisi.
«Bıyl telearna komedııalyq fılmderden melodramaǵa deıin, bıografııadan aýqymdy tarıhı fılmderge deıin zamanaýı televızııalyq ónimniń barlyq janryn qamtıtyn birqatar jobalar shyǵarady. Kóktemde batyr babalarymyzdyń erligin nasıhattaıtyn «Babalar joly», ómirden alynǵan shynaıy oqıǵa negiz bolǵan «Altynshy beket» serıaldary kórsetiledi. Osydan birneshe jyl buryn Qazaqstannyń batysynda qylmyskerler abaqtydan qashýǵa árekettengen edi, olardy sarbazdar erlikpen toqtatqan bolatyn», - dep habarlady arna dırektory Erlan Igisinov Ortalyq kommýnıkatsııalar qyzmetinde ótken baspasóz máslıhatynda.
2010 jyldyń 22 maýsymynda Aqtaý túrmesindegi 21 tutqyn qashýǵa árekettendi.
Sol kúni №6 bekettiń kúzetshisi qatardaǵy jaýynger Erbol Otarbaev qashpaq bolǵan qylmyskerlerdiń jolyn kesti. Dýaldyń syrtynda turǵan qashqyndardyń sybaılastary saqshynyń kózin joımaq bolyp, oq jaýdyrǵan, jaýynger Otarbaev taǵy birneshe oq atyp, úsh qashqyndy mert qyldy.
Syrtta turǵan sybaılastardyń kóligine qashqyndardyń birnesheýiniń aıaǵy ilinedi de, ózgeleri jaqyn mańdaǵy salynyp jatqan qurylys nysanyna jetip jasyrynady. Al jedel izge túsken top kolonııadan 200 metrdeı jerge qashyp úlgergen taǵy bir tutqyndy jaralaıdy. Bir apta ótken soń, qashqyndar men onyń sybaılastary Mańǵystaý aýdanyndaǵy Qyzylsaı ańǵarynda qorshaýǵa alyndy. Olardyń altaýy ustalyp, qalǵandary avtokólikpen birge jarylyp ketti.
Atalǵan oqıǵadan soń QR Ádilet mınıstrligi QAJ komıtetiniń basshysy Meıram Aıýbaev pen onyń eki orynbasary otstavkaǵa ketti. Al, túrme basshylyǵyna qatysty qylmystyq is qozǵaldy.
