Aqtaý túrmesine marıhýana ótkizbek bolǵan azamat ustalyp qaldy
ASTANA. QazAqparat - Aqtaýdaǵy kolonııaǵa «Assam» shaıynyń qorabyna jasyryp 4 uıaly telefon, sonymen qatar 47 dana shylymmen esirtki zattaryn ótkizbek bolǵan azamattyń áreketine tosqaýyl qoıyldy. Bul jaıynda QR Іshki ister mınıstrligi Qylmystyq-atqarý júıesi komıtetinen málim etti, dep habarlaıdy QazAqparat.
«Mańǵystaý oblysynyń turǵyny sottalýshymen qysqa merzimdi kezdesýge kelgen kezinde tyıym salynǵan zattardy zańsyz bergeni úshin jaýapkershilik bar ekendigin mekeme ákimshiligi eskertken bolatyn. Alaıda, ol quqyq buzýshylyqqa jol berdi», - dedi Mańǵystaý oblystyq qylmystyq-atqarý júıesi departamentiniń bastyǵy Teımýr Gashımov.
Onyń aıtýynsha, azyq-túlik taǵamdaryn tekserý barysynda «Assam» shaıynyń tórt qorabynyń árqaısysynan uıaly telefon men sım-kartalar tabylǵan.
«Sonymen qatar birneshe ondaǵan temeki tekserildi. Kóp eńbekti talap etken jumys jemisti aıaqtaldy. 47 dana shylymnan ózindik ıisi bar zattardyń oramy tabyldy», - dedi departament basshysy.
Vedomstvo málimetinshe, sot-hımııalyq saraptama barysynda tárkilengen zattardyń salmaǵy shamamen 170 gramm bolatyn marıhýana men 100 grammǵa jýyq áseri kúshti gashısh ekendigi anyqtaldy. Jınalǵan materıaldar protsessýaldy sheshim qabyldaý úshin Mańǵystaý oblystyq ishki ister departamentine jiberildi.
