Aqtaý túrki áleminiń mádenı astanasy bolady
2025 jyly Aqtaý túrki áleminiń mádenı astanasy bolady. Bul týraly Qazaqstannyń halyqaralyq TÚRKІSOI uıymyndaǵy ókili Baqytjan Omarov málim etti, dep habarlaıdy Kazinform.
Mańyzdy sheshim Ázerbaıjannyń Shýsha qalasynda ótken atalǵan uıymǵa múshe memleketterdiń mádenıet mınıstrleri bas qosqan jıynda qabyldandy.
«Osy jıynda Qazaqstannan bólek, Qyrǵyzstan jáne Ózbekstan, Soltústik Kıpr, Túrkııa ózderin usyndy. Biraq kópshilik daýyspen Qazaqstannyń Aqtaý qalasy jeńip shyqty. Túrki áleminiń teatr festıvali, sýretshiler basqosýy, ıaǵnı túrki álemine qatysty mádenı sharalardyń bári Aqtaý qalasynda ótedi. Mádenı astananyń ashylýy men jabylý saltanatyna úlken kontsert uıymdastyrylady. 2024 jyldyń basynda ótetin TÚRKІSOI uıymynyń 41-otyrysynda Aqtaý qalasynyń ákimshiligi jıynǵa kelip, óziniń tanystyrylymyn jasaýy tıis», –dedi Baqytjan Omarov «Mańǵystaý» telearnasyna bergen suhbatynda.
Kaspıı jaǵalaýyna jınalyp, túrli is-sharalar ótkizý óńirdiń týrıstik áleýetin arttyrmaq. Buǵan deıin elimizdegi túrki áleminiń mádenı astanalary Astana men Túrkistan bolǵan.
