Aqtaý turǵyny Shetpe eldi mekeniniń mańynan belgisiz janýardyń súıekterin taýyp aldy

NUR-SULTAN. QazAqparat - Aqtaýlyq azamat Shetpe eldi mekeniniń mańynan belgisiz janýardyń súıekterin taýyp aldy, dep habarlaıdy Habar24.kz.

Ol kezikken qańqa osydan 100 mln jyl buryn teńizde ómir súrgen dınozavr bolýy múmkin. Vladımır esimdi qala turǵyny óz jańalyǵyn áleýmettik jelide jarııalaǵan. Áýesqoı túsirilimdi reseılik sarapshylar da kóripti.

Olardyń aıtýynsha, bul súıekter ıhtozavrǵa tıesili bolýy múmkin. Alaıda bul boljamnyń rastyǵy tek saraptama jumystarynan soń belgili bolmaq. Qazir ol beınetaspany qazaqstandyq mamandarǵa kórsetýdi josparlap júr.

«Qańqa súıekteri tabylǵan jerdi syrt kózden jasyrýdy oıladym. Óıtkeni olarǵa qol tıse, kúl bolyp shashylyp qalýy múmkin. Sol úshin tek uıaly telefonǵa túsirip alyp, áleýmettik jelige júktedim. Ony zertteýmen óz isiniń mamandary jumystanýy qajet dep oılaımyn»,-dedi qala turǵyny Vladımır ıArtsev.