Aqtaý turǵyndaryna qosymsha 4 myń tekshe metr sý beriledi

AQTAÝ. QazAqparat – Mańǵystaý atom energetıkalyq kombınatynda (MAEK) býlaný qurylǵysyndaǵy jylý almasý qubyrlary aýystyrylyp jatyr. Jóndeý jumystarynan keıin Aqtaý turǵyndary táýligine qosymsha 4 myń tekshe metr kólemde aýyzsýmen qamtamasyz etiledi, dep habarlaıdy QazAqparat tilshisi.

Ortalyqtaǵy tushytý qondyrǵysy 1989 jyly paıdalanýǵa berilgen. Qondyrǵynyń eskirgendiginen qalaǵa qosymsha sý berýde biraz qıyndyq týyndaǵan. Máseleni sheshý maqsatynda Mańǵystaý oblysy ákimdiginiń rezervinen «MAEK» JShS-ǵa 2,6 mlrd teńge bólý josparlanyp otyr.

«Jylytý kamerasy – bul tushytý qondyrǵysynyń negizgi bólikteriniń biri. 34 jyl boıy irkilissiz qyzmet etken jylý almasý tútikteriniń ishinde qaq paıda bolǵandyqtan jóndeý, tazartý jumystary júrgizilip jatyr. Qazirgi ýaqytta kamerada 3164 tútik bar, salmaǵy 32 tonnany quraıdy. Bólingen qarjyǵa barlyǵy 78 tonna 740 keli tútik satyp alyndy. Bul eki jylytý kamerasy men eki jylytqyshtyń qalypty jumysyn qamtamasyz etedi, - deıdi

«MAEK» JShS dıstıllıat óndirisi jáne óndiristik jylýmen jabdyqtaý zaýytynyń bas ınjeneri Denıs Samorýkov.