Aqtaý turǵyndary teńizde katamaranmen saıahat jasaı alady
ASTANA. QazAqparat - Tamyz aıynyń sońynda Aqtaý turǵyndary men qonaqtaryna teńizde katamarandarmen serýendeıtin múmkindik týady, dep habarlaıdy QazAqparat.
40 adamǵa arnalǵan saıahat týrlarynyń miný aıaldamasy - 14A shaǵyn aýdanynan bastalmaq. Qazirgi ýaqytta 14A shaǵyn aýdanyndaǵy «I love Aktau» jazýy bar alań janynan katamarannyń jańa aılaǵy salynyp jatyr.
Kásipker Sergeı Vorojeıkınniń aıtýynsha, katamaran taılandtyq jobamen Reseıdiń Astrahan qalasynda jasalǵan. Olardyń sany úsheý: «Natalı», «Lagýna» jáne «Oazıs». «Natalı» men «Lagýna» týrlar úshin qoldanylsa, «Oazıs» jeke tapsyrys berýshilerge arnalǵan.
«Bılettiń quny 1 000 teńge dep belgilendi. Bul qarapaıym turǵyndar úshin qoljetimdi», - deıdi «GÝNA-Aktaý» JShS basshysy Natalıa Vorojeıkına.
Aıta keteıik, Kaspıı teńizindegi serýen 1 saǵatqa sozylady.
«Jobamyz ótken jyly týrızm salasyndaǵy «Saıahat» baǵdarlamasy aıasynda 80 mıllıon teńgege qarjylandyryldy. Biz «Damý» qorynan 7,8% jyldyq mólsherlememen nesıe alyp otyrmyz. Katamaranǵa jolaýshy ózimen birge sýsyn, taǵam alyp kire alady. Otyryp tamaqtaný úshin arnaıy ústel, oryndyqtar qarastyrylǵan», - deıdi Sergeı Vorojeıkın.
Serýendeý týrlary jyl saıyn mamyr aıynyń basynan qazannyń ortasyna deıin jalǵasady. Aýa raıyna baılanysty týrlar maýsymy ózgerýi múmkin.
Aıgúl Dáden
