Aqtaý turǵyndary qys ishinde mektepte bastalǵan jóndeý jumystaryna narazy
ASTANA. QazAqparat - Aqtaý turǵyndary men oqýshylardyń ata-analary qys ishinde №2-mektep shatyrynyń jóndele bastalǵanyna tańǵalýda.
Azamattar dalada jańbyr aralas qar jaýyp turǵan shaqta mektep shatyrynyń alynyp jatqanyna alańdaýly, dep jazdy tumba.kz.
Mektep dırektory Álııa Nurymbaevanyń aıtýynsha, shatyr keńes ýaqytynan beri jóndelmegen. Shatyrdan sý kete bastaǵan. «2010 jyly ǵımarat jóndelgen, biraq ol kezde shatyr qarastyrylmaǵan. Máslıhat jóndeý jumystaryna 19 mıllıon teńgeni qarasha aıynyń sońynda bóldi. «Qurylys Mańǵystaý» kompanııasy jumystardy 12 mıllıonǵa jasap berýge kelisti. Jumys 25 jeltoqsanda bastaldy, qysqy kanıkýl boıy jalǵasady. Qazir qar jaýyp, jumys toqtap tur», - dedi ol.
Aıaq astynan bastalǵan jumysqa alańdaýshylyq bildirgen turǵyndarǵa merdigerlik uıym dırektory J. Seıilhan jaýap berdi. «Bıýdjetten aqsha endi tústi, sosyn jumysqa kirisip kettik. Jańa jyldan bastap jańa bıýdjet josparlanady, sondyqtan jumysty bastaýymyz qajet. Jumyskerlerdiń 7-10 jyldyq tájirıbesi bar. Olar qaýipsizdik sharalaryn saqtaıtyn bolady», - dedi ol.
Onyń aıtýynsha, jaýyn-shashyn jumys sapasyna keri áser etpeıdi. Jumys bir aıǵa josparlanǵan.
Alaıda, sýretterden shatyrdyń bólshektelip emes, tolyǵymen alynyp tastalǵanyn kórýge bolady. Ári aýa raıyna qaramastan jumystar júrip jatyr. Aqtaý turǵyndarynyń pikirinshe, qaýipsizdik tehnıkasy saqtalmaǵan ári shıfer bólshekteri tómen qaraı, balalardyń basyna túsýi múmkin. Qurylysshylar da bıiktikte saqtandyrýsyz eńbek etýde. Shatyr jabyndysy túgel derlik alynǵan, qar jaýyp tur. Ǵımarat dymdanyp, jóndeý jumystaryna qosymsha qarajat bólýge, al oqýshylarǵa dymqyl synypta bilim alýǵa týra keledi.
