Aqtaý turǵyndary qala mańyndaǵy jarylysty vıdeoǵa túsirip alǵan
ASTANA. QazAqparat - Aqtaý qalasyndaǵy tómengi móltekaýdandardyń turǵyndary óz páterlerinen dúmpýdi sezinip, qala mańynda bolǵan jarylysty vıdeoǵa túsirip alǵan. Bul týraly qala turǵyndary áleýmettik jelide jarysa jazýda. Mańǵystaý oblystyq tótenshe jaǵdaılar departamenti bolǵan oqıǵaǵa keıinirek túsinik berýge ýáde etti, dep habarlaıdy lada.kz.
Aqtaýdyń 3, 4, 7, 8 jáne 9 móltekaýdandarynyń jáne ónerkásip aımaǵynyń turǵyndary saǵat 20:00 shamasynda óz páterlerinen qatty dúmpýdi sezgenderin jazýda.
«Jarylystyń qatty bolǵany sonshalyq, 3-móltekaýdandaǵy úıimiz terbelip ketti jáne 2-móltekaýdandaǵy dostarymyz da dúmpýdi sezgenderin jáne jarylysty estigenderin aıtyp jatyr...», - dep jazdy áleýmettik jelige Aqtaý turǵyndary.
«Men «Kamaz» kóligi úıimizge kirip ketti dep oıladym, sebebi dúmpý birer sekýndta bolsa da, ony qatty sezindik», - dedi kýágerler.
«Qalada ne bolyp jatqanyn kim bilsin? Ónerkásip aımaǵynan estildi...», - dep aıtty qala turǵyndary.
Mańǵystaý oblystyq tótenshe jaǵdaılar departamentiniń baspasóz qyzmeti habarlaǵandaı, kezekshilik bólimine jarylys týraly eshqandaı habarlama túspegen. Vedomstvodaǵylar oqıǵany tolyǵyraq anyqtap, keshirek túsindirýge ýáde etti.
