Aqtaý túbindegi ushaq apatynyń aldyn ala sebepteri kelesi aptada aıtylady

ASTANA. KAZINFORM — Premer-mınıstrdiń orynbasary Qanat Bozymbaev Aqtaý túbindegi ushaq apatynyń aldyn ala sebepteri kelesi aptada aıtylatynyn málim etti.

— Qazir tekserý júrip jatyr. Kólik mınıstrligi janynan qurylǵan arnaıy top bar. Onyń ishinde bizdiń de saparshylar, Reseı tarapynyń, Brazılııanyń mamandary, ICAO tarapynan Nıderland eliniń bir ókili. Qazir «qara jáshiktiń» dybys derekterin qarap jatyr. Ushaqtyń rejımderin qarap olardy sáıkestendiredi. Árıne, ol biraz jumys. Óıtkeni ony dáleldeý úshin tekserý jasaıdy. Olardyń daýysy ma, basqa daýys pa degen sııaqty. Qaı mınýtta, qaı sekýndta kim ne aıtqanyn, kimniń qandaı pármen bergenin zertteıdi, — dedi ol Úkimet úıindegi baspasóz máslıhatynda.

Onyń aıtýynsha, ICAO-nyń standarty boıynsha áýe apatynyń aldyn ala sebepteri bir aıdyń ishinde jarııalanýy kerek.

— Osy máselelerdiń bárin kelesi aptada bitiredi dep oılaımyn. Aıaqtaıtyn sııaqty. ICAO-nyń talaptaryna sáıkes bir aıdyń ishinde aldyn ala qorytyndylardy jarııalaý kerek. Sol usynymdarǵa súıensek, kelesi aptada bizdiń jaýapty mınıstrlik tıisti aqparatty beredi, — dedi Qanat Bozymbaev.

Aıta keteıik, 25 jeltoqsanda Aqtaý mańynda Bakýden Groznyıǵa baǵyt alǵan AZAL jolaýshylar ushaǵy apatqa ushyraǵan bolatyn.

Bortta 67 adam, onyń ishinde bes ekıpaj múshesi bolǵan. Apat saldarynan 38 jolaýshy qaza taýyp, 29 adam aman qaldy.

Buǵan deıin QazAqparat Brazılııa Áskerı-áýe kúshteriniń Áýe apattaryn zertteý ortalyǵynyń (Cenipa) mamandary AZAL áýe kompanııasynyń apatqa ushyraǵan Embraer 190 ushaǵynyń qara jáshigin taldaýǵa kiriskenin habarlaǵan bolatyn.

Qazaqstan Respýblıkasy Kólik vıtse-mınıstri Talǵat Lastaev QazAqparat tilshisine áýe apatyn tergeýdiń aldyn ala qorytyndysy qashan belgili bolatynyn aıtty.

30 jeltoqsanda Halyqaralyq áýe kóligi qaýymdastyǵy (IATA) oqıǵany jan-jaqty jáne beıtarap tergeýge shaqyrdy.

Jaqynda QR Kólik mınıstrligi Aqtaý mańyndaǵy ushaq apatyna qatysty málimdeme jasady.