Aqtaý teńiz portynyń qyzmet etý merzimi 2053 jylǵa deıin uzartyldy
AQTAÝ. KAZINFORM - Bıyl Memleket basshysynyń tapsyrmacyna sáıkes «Aqtaý teńiz porty» arnaıy ekonomıkalyq aımaǵynyń aýmaǵy men damý baǵyttary keńeıtildi.
- Prezıdenttiń sáýir aıynda Mańǵystaý oblysyna jasaǵan jumys sapary barysynda arnaıy ekonomıkalyq aımaq óńirdegi kásipkerlikti damytýdaǵy negizgi ortalyq bolýy tıis ekeni atap ótilgen. Osyǵan baılanysty AEA-nyń qyzmet etý merzimi 2028 jyldan 2053 jylǵa deıin uzartyldy, - dedi «Aqtaý teńiz porty» AEA» AQ basqarma tóraǵasy Múbárak Tólegenov.
Memleket basshysynyń mýltımodaldi habtardy damytý jónindegi tapsyrmasy aıasynda Aqtaý halyqaralyq áýejaıy da arnaıy ekonomıkalyq aımaq quramyna engizildi.
Sonymen qatar óńirdiń kólik-logıstıkalyq, týrıstik áleýetin jáne óńdeý ónerkásibin damytý maqsatynda QR Ónerkásip jáne qurylys, Kólik, Týrızm jáne sport mınıstrlikteriniń, sondaı-aq oblys ákimdiginiń qoldaýymen AEA aýmaǵy keńeıtildi. Quramyna Aqtaý qalasy, Jańaózen qalasynyń ónerkásiptik aımaǵy, «Sarja» teńiz termınaly jáne Kendirli kýrorttyq aımaǵynyń birinshi kezeńi qosyldy.
Nátıjesinde arnaıy ekonomıkalyq aımaqtyń jalpy aýmaǵy 9,8 myń gektarǵa deıin ulǵaıyp, ındýstrııalyq, porttyq, logıstıkalyq jáne týrıstik baǵyttardy qamtıtyn 15 qosalqy aımaqqa bólindi.
Budan bólek, otandyq taýar óndirýshilerdi qoldaý jáne jańa óndiristerdi ornalastyrý maqsatynda AEA quramyna qosymsha 17 myń gektar jer ýchaskesin engizý jumystary júrgizilip jatyr. Bul aldaǵy ýaqytta aımaq aýmaǵyn 26,6 myń gektarǵa deıin keńeıtýge múmkindik beredi.
Sondaı-aq AEA-nyń basym qyzmet túrleri tizimi keńeıtilip, oǵan kemeler men qaıyqtardy jóndeý, kıim, jıhaz jáne aǵash buıymdary óndirisi sııaqty 23 jańa qyzmet túri engizildi.
Qabyldanǵan sheshimder Kaspıı jaǵalaýyndaǵy teńiz ınfraqurylymyn damytýǵa, port operatsııalarynyń tıimdiligin arttyrýǵa, logıstıkany kúsheıtýge jáne arnaıy ekonomıkalyq aımaqtyń ınvestıtsııalyq tartymdylyǵyn arttyrýǵa baǵyttalǵan.
Aıta keteıik, Aqtaý teńiz porty konteınerlerdi aýystyryp tıeý boıynsha rekordtyq kórsetkishke qol jetkizdi.