Aqtaý teńiz portynyń eks-basshysyna qatysty is: prokýror 8 jyl jaza surady

Іs qaı satyda

Abaı Túrikpenbaev 2025 jyldyń mamyr aıynda ustaldy. Al 2025 jyldyń 25 sáýirinen bastap tergeý ızolıatorynda otyr. Іs boıynsha tórt aıyptalýshyǵa qatysty 83 tom materıal jınalǵan. Qylmystyq is shamamen jarty jyldan beri qaralyp jatyr. Búgingi tańda taraptardyń jaryssózi ótti. Jaqyn arada úkim jarııalanady dep kútilip otyr.

Aıyptalýshylarǵa taǵylǵan aıyptar

Aıyptalýshylar — tórt laýazymdy tulǵa. Onyń biri — Aqtaý teńiz portynyń burynǵy prezıdenti Abaı Túrikpenbaev QR Qylmystyq kodeksiniń 28-baby 5-bóligi, 190-baby 4-bóligi 2-tarmaǵy boıynsha (alaıaqtyqqa kómektesý, ıaǵnı bóten múlikti aldaý jáne senimdi teris paıdalaný arqyly ıelený, aldyn ala sóz baılasqan toppen, qyzmettik jaǵdaıyn paıdalana otyryp, asa iri mólsherde) aıyptalyp jatyr. Sondaı-aq oǵan QR QK-niń 361-baby 1-bóligi boıynsha aıyp taǵylǵan (qyzmettik ókilettikterdi qyzmet múddesine qarsy paıdalaný arqyly ózine nemese basqa adamdarǵa paıda keltirý jáne uıymǵa eleýli zııan keltirý).
«Aqtaý halyqaralyq teńiz saýda porty» UK» AQ kommertsııalyq jumystar jónindegi atqarýshy dırektory Ahmad Mustafın QR QK-niń 190-baby 4-bóligi 2-tarmaǵy boıynsha (alaıaqtyq) aıyptalyp otyr. Sonymen qatar oǵan 339-1-bap 3-bóligi 5-tarmaǵy boıynsha aıyp taǵylǵan (sırek jáne joıylyp bara jatqan janýarlardyń bólikterin zańsyz satyp alý, saqtaý jáne tasymaldaý).

Qylmystyq is boıynsha Maqsat Nurken jáne Bahytbek Baqtybaev da aıyptalyp jatyr. Olarǵa 28-bap 5-bóligi (qylmysqa kómektesý) jáne 361-bap 1-bóligi (qyzmettik ókilettikterdi teris paıdalaný) boıynsha aıyp taǵylǵan.

Memlekettik aıyptaýshynyń ustanymy

Prokýror sot jaryssózinde aıyptalýshylardyń kinási tergeý jáne sot barysynda jınalǵan dálelderdiń jıyntyǵymen dáleldengenin málimdedi. Oǵan kýálar men jábirlenýshilerdiń jaýaptary, aıyptalýshylardyń jaýaptary, tekserý aktileri, shamamen 2 mlrd 202 mln teńge kólemindegi alynbaǵan tabysty kórsetetin qarjylyq buzýshylyqtar, sot-ekonomıkalyq saraptama qorytyndylary dálel. Memlekettik aıyptaýshy keıbir mindetti qyzmetter esepteýden negizsiz alynyp, sonyń saldarynan iri kólemde tabys túspeı qalǵanyn alǵa tartty.

Prokýror Abaı Túrikpenbaevqa 8 jyl bas bostandyǵynan aıyrý jazasyn, ómir boıy memlekettik qyzmette jumys isteýge tyıym salýdy jáne múlkin tárkileý jazasyn surady. Dál osyndaı jaza Ahmad Mustafın úshin de suraldy. Al qalǵan eki aıyptalýshyǵa — 1 jyl bas bostandyǵynan aıyrý jazasy suraldy. Sonymen qatar, memlekettik aıyptaýshy aıyptalýshylardan porttyń paıdasyna 1,8 mln teńge kólemindegi zalaldy óndirýdi surady. Sondaı-aq, teńiz portynyń paıdasyna Túrikpenbaev pen Mustafınnen 2,2 mlrd teńgeni ortaq (solıdarlyq) tártippen óndirýdi qanaǵattandyrýdy ótindi.

Qorǵaý tarapynyń pikiri

Qorǵaý tarapy sotta aıyptalýshylardyń kinási dáleldenbegenin málimdedi. Advokat Radık Ómirbolattyń aıtýynsha, qylmystyń naqty jasalǵanyn jáne árbir aıyptalýshynyń oǵan qatysyn dáleldeıtin jetkilikti aıǵaqtar usynylmaǵan.

Sondaı-aq, ol qasaqanalyq, nıet jáne qylmys jasaý tásili boıynsha da naqty dálelder joq ekenin alǵa tartty. Qorǵaý tarapy keıbir saraptamalyq jáne tehnıkalyq materıaldar aıyptaý nusqasyn tolyq rastamaıtynyn, al birqatar dáleldiń zańdylyǵyna kúmán bar ekenin atap ótti.

Advokattyń aıtýynsha, 2 mlrd teńgeden asatyn bul soma — urlyq emes, tek boljamdy jiberip alynǵan paıda. Onyń pikirinshe, mundaı jaǵdaı alaıaqtyq retinde saralanýy múmkin emes.

— Alaıaqtyq — bul bóten múlikti urlaý nemese oǵan quqyqty zańsyz ıemdený. Alaıaqtyqtyń bolýy úshin múlik naqty túrde alynýy nemese basqa adamdardyń ıeligine ótip, olardyń ony ıelenýge, paıdalanýǵa jáne bılik etýge naqty múmkindigi bolýy kerek. Alaıda aıyptaý tarapy munda derbes ári normatıvtik júıede mindetti dep tanylǵan qyzmet úshin tólemdi negizge alyp otyr. Biraq ol qyzmettiń jeke ári mindetti ekeni dáleldenbegen. Eger naqty mindetti qyzmet te, sol tólemdi esepteý tetigi de bolmasa, onda mindetti tarıftiń eseptelmegeni týraly aıtýǵa negiz joq, — deıdi advokat.

Aıta keteıik, Abaı Túrikpenbaev Aqtaý halyqaralyq teńiz-saýda portyn 2017 jyldan beri basqardy.

Buǵan deıin, Aqtaý teńiz-saýda porty basshysyna qatysty is sotta qarala bastaǵanyn jazǵan bolatynbyz.