Aqtaý teńiz portynyń burynǵy basshysy sot zalynan bostandyqqa shyqty
AQTAÝ. KAZINFORM — Aqtaý teńiz portynyń burynǵy basshysy sybaılas jemqorlyq isi boıynsha úkim shyqqannan keıin bostandyqqa shyqty. Sot jaza taǵaıyndady, biraq SIZO-da otyrǵan ýaqytyn «bir kún - eki kún» formýlasy boıynsha esepke aldy. Bul týraly Mańǵystaý oblystyq sotynyń baspasóz qyzmeti rastady.
Sot porttyń burynǵy prezıdenti Abaı Túrikpenbaevty jáne taǵy úsh fıgýrantty kináli dep tanydy. Abaı Túrikpenbaev 2 jylǵa bas bostandyǵynan aıyryldy, biraq tergeý ızolıatorynda (SIZO) ótkizgen ýaqyty esepke alynǵandyqtan bosatyldy. Al Ahmad Mustafın 4,5 jylǵa sottaldy, taǵy eki fıgýrant ta bostandyǵyn shekteý jazasyn aldy. Sonymen qatar barlyǵyna memlekettik sektorda jumys isteýge ómir boıyna tyıym salyndy.
Sot talap-aryzdy qanaǵattandyryp, Mustafındi portqa 2 mlrd teńgeden astam shyǵyndy óteýge mindettedi, al qalǵan fıgýranttar memleket pen kásiporyn paıdasyna ortaq tártipte tólem jasaýǵa mindetteldi.
Aıta keteıik, Abaı Túrikpenbaev Aqtaý teńiz portyn 2017 jyldan beri basqardy. Oǵan qatysty qylmystyq is qoǵamda úlken rezonans týdyrdy. Úkim ázirge zańdy kúshine engen joq.
Buǵan deıin Aqtaý teńiz portynyń eks-basshysyna prokýror 8 jyl jaza suraǵan bolatyn.
