Aqtaý teńiz portynyń aýmaǵy keńeıdi

ASTANA. KAZINFORM — El Úkimetiniń 5 jeltoqsandaǵy qaýlysymen «Aqtaý teńiz porty» AEA shekarasy keńeıtildi.

Qujatta «Aqtaý teńiz porty» arnaıy ekonomıkalyq aımaǵy Mańǵystaý oblysynyń aýmaǵynda Ashtaý men Jańaózen qalalarynyń, Munaıly, Qaraqııa, Túpqaraǵan aýdandarynyń ákimshilik-aýmaqtyq shekaralary sheginde ornalasqany atap ótiledi. 

- AEA aýmaǵy Aqtaý halyqaralyq áýejaıyn qosa alǵanda 9 814,503 gektardy quraıdy jáne QR aýmaǵynyń ajyramas bóligi sanalady, - delingen qujatta.

Buǵan deıin atalǵan aımaqtyń aýdany 4 407,503 gektardy quraǵan edi.

Sonymne qatar «Aqtaý teńiz porty» AEA aýmaǵynyń jospary jańa jańartyldy. Soǵan sáıkes, AEA aýmaǵyna mynalar kiredi:

- port aımaǵy – 656,3543 gektar;
- ındýstrıaldyq aımaq – 7 428,1487 gektar;
- logıstıkalyq aımaq – 1 730 gektar.

Arnaıy ekonomıkalyq aımaq úshin 2052 jylǵa arnalǵan jańa maqsatty ındıator belgilengen:

- jalpy ınvestıtsııa kólemi – 1 320 mlrd teńge (980 mlrd teńge bolatyn);
- AEA aýmaǵyndaǵy taýarlar men qyzmetter (jumystar) óndirisiniń kólemi – 1 600 mlrd teńge.
- qatysýshylar (kompanııalar) sany – 180 birlik (150 bolatyn);
- AEA aýmaǵynda qurylatyn jumys oryndarynyń sany – 7 900 adam (5 800 bolatyn).

AEA aýmaǵynda óndiristiń jalpy kólemindegi qazaqstandyq qamtý úlesi 83 paıyzdy (ózgerissiz) quraıdy.

Aıta keteıik, buǵan deıin Aqtaý men Quryq porttary jańǵyrtylyp, Ázerbaıjannan eki keme satyp alynatyny habarlandy.