Aqtaý teńiz portyna munaı tasymaldaıtyn jańa tankerler ákelindi
Mańǵystaýdaǵy Halyqaralyq teńiz saýda portyna jańa tankerler ákelindi. «Taraz» jáne «Liwa» dep atalǵan kemeler munaıdy tasymaldaý úshin qoldanylady. Aqtaý portynda kemelerdi saltanatty qabyldaý is-sharasy ótti, dep habarlaıdy Kazinform.
Tankerler «QazMunaıGaz» ulttyq kompanııasy aktsıonerlik qoǵamy men Abu Dhabi Ports Group arasyndaǵy yntymaqtastyq aıasynda satyp alyndy. Jańa tankerler «Qazaqteńizkólikfloty» seriktestigi men International Maritime Investments Ltd kompanııasy birlese qurǵan kásiporynǵa tıesili.
Sý kólikteri 8 myń tonnaǵa deıin munaı tasymaldaýǵa qaýqarly. Tankerler nıderlandtyq «Damen» kontserniniń verfinde salynǵan. Árqaısysynyń uzyndyǵy – 140 metr, eni – 16,7 metr, al shógindisi – 4,2 metr, jyldamdyǵy – 10 torap. Eki tanker de ozyq basqarý júıelerimen jabdyqtalǵan, olar barlyq halyqaralyq qaýipsizdik standarttary men ekologııalyq talaptarǵa saı.
Kemelerdi qabyldaý is-sharasyna Mańǵystaý oblysynyń ákimi Nurlan Noǵaev, «QazMunaıGaz» UK» aktsıonerlik qoǵamynyń basqarma tóraǵasy Maǵzum Myrzaǵalıev, Birikken Arab Ámirlikteriniń Qazaqstan Respýblıkasyndaǵy elshisi Muhammed Saıd Ál-Arıkı, ADP Basqarma Tóraǵasy Muhammed Djýma Ál-Shamısı, «Qazaqteńizkólikfloty» UTKQK» JShS Bas dırektory Aıdar Orjanov jáne basqa da qonaqtar qatysty.
«Tankerlerdiń biri BAÁ-degi oazıs-Liwa degen mekenniń atymen, al ekinshi tanker Qazaqstannyń ejelgi qalasy-Tarazdyń atymen ataldy. Jańa tankerlerdi satyp alý arqyly biz Transkaspıı baǵytyn damytýda mańyzdy qadam jasap otyrmyz. Osyǵan baılanysty birlesken jobany sátti júzege asyrǵany úshin strategııalyq seriktesimizge shyn júrekten alǵysymdy bildirgim keledi. Jańa tankerler munaı flotyn jahandyq logıstıkalyq naryqqa shyǵarýǵa jol ashady», - dedi «QazMunaıGaz» UK» aktsıonerlik qoǵamynyń basqarma tóraǵasy Maǵzum Myrzaǵalıev.
Mańǵystaý oblysynyń ákimi Nurlan Noǵaev ekijaqty yntymaqtastyqty nyǵaıtýǵa jáne elimizdiń kólik-logıstıka salasyn damytýǵa baǵyttalǵan bastamalarǵa qoldaý kórsetetinin aıtty.
«Bul tankerlerdi satyp alý Memleket basshysy Qasym-Jomart Toqaevtyń qazaqstandyq kómirsýtek eksportynyń balamaly baǵyttaryn damytý jónindegi tapsyrmasyn oryndaý aıasynda júzege asyryldy. Biz árqashan óńirimizdi jan-jaqty damytýǵa baǵyttalǵan barlyq bastamalardy qoldaýǵa daıynbyz. «Qazaqteńizkólikfloty» Ulttyq tasymaldaýshysynda iske qosylatyn eki munaı tankeri elimizdiń ekonomıkasy men kólik-logıstıka salasynyń damýy men órkendeýine qyzmet etetinine senemin», - dedi Nurlan Noǵaev.
ADP basqarma tóraǵasy Muhammed Djýma Ál-Shamısı qazaq eline birlesken joba úshin alǵysyn bildirdi.
«Búgin Transkaspıı baǵytyn damytýǵa mańyzdy qadam jasaldy. Abu Dhabi Ports Group basqarma tóraǵasy retinde qazaq eline birlesken jobany tabysty júzege asyrǵanymyz úshin alǵys aıtamyn. Birlesken kásiporyn jahandyq logıstıka naryǵyna shyǵyp, óz qyzmetin qarqyndy damytýǵa maqsat qoıdy. Flotty keńeıtý de josparlanǵan. Mańǵystaý oblysynyń ákimdigi ekijaqty yntymaqtastyqty nyǵaıtýǵa nıetti ekeni bizdi qýantady», - dedi Muhammed Djýma Ál-Shamısı.
Іs-sharada eki el ánurany oryndalyp, kemelerdiń «ókil analary» qabyldaý rásimin ótkizdi. «Taraz» tankerin qabyldaý qurmetine Qazaqstannyń bilim salasyndaǵy Eńbek eri, ardaqty ustaz Aıagúl Mırazova shaqyryldy. Al «Liwa» kemesin BAÁ-den kelgen Mýbaraka Ál-Mazroýeı hanym qabyldady.
Tankerlerdi jeltoqsanda paıdalanýǵa berý josparlanyp otyr.
Aıta ketsek, 2023 jyldyń naýryz aıynan bastap Qazaqstan munaıy Aqtaý-Baký-Tbılısı-Djeıhan baǵyty boıynsha jylyna 1,5 mln tonna kólemde jóneltile bastady. Qazaqstan ben Ázerbaıjan parıtet negizinde munaıdy Aqtaý – Baký teńiz baǵyty boıynsha tasymaldaıdy. Al jańa tankerler qazaqstandyq taraptyń jylyna 750 myń tonna kóleminde munaı tasymaldaý mindettemesin tolyq oryndaýǵa múmkindik bermek.
