«Aqtaý teńiz porty» aımaǵy 382 gektarǵa keńeıedi
ASTANA. KAZINFORM – Aqtaý teńiz porty aımaǵynyń qyzmet etý merzimi 2053 jylǵa deıin uzartyldy. Bul týraly Ónerkásip jáne qurylys vıtse-mınıstri Iran Sharhan Úkimette aıtty.
— «Aqtaý teńiz porty» Kaspıı óńirine shyǵýǵa jol ashatyn negizgi arnaıy ekonomıkalyq aımaq. Sondyqtan bıyl aımaqtyń qyzmet etý merzimi 2053 jylǵa deıin uzartyldy. Sondaı-aq, ónerkásip pen logıstıkany odan damytý maqsatynda aımaqqa qosymsha jer ýchaskeleri qosyldy. Atap aıtqanda, óndiristik aımaqqa Aqtaý jáne Jańaózen qalalaryndaǵy jańa ýchaskeler qosylyp, qosymsha óńdeý óndiristerin ornalastyrýǵa múmkindik berdi, — dedi I.Sharhan.
Logıstıkalyq aımaqqa áýejaılar, Aqtaý jáne Quryq porttary jáne teńiz termınaldary («Sarja» halyqaralyq teńiz termınaly) kirdi. Aldaǵy ýaqytta «Aqtaý teńiz porty» aımaǵyn 382 gektarǵa keńeıtý kózdelip otyr. ıAǵnı, aımaqqa «Ersai Caspian Contractor» qazaqstandyq qurylys jáne teńiz kompanııasynyń terrıtorııasy qosylyp, saýda, logıstıka jáne teńiz ınfraqurylymyn damytýǵa jańa múmkindikter ashylady.
Buǵan deıin Kólik mınıstri Nurlan Saýranbaev Aqtaý men Quryq porttary jańǵyrtylyp, Ázerbaıjannan eki keme satyp alynatynyn aıtqan edi.
Sonymen birge, ınvestor qarajatyna aýmaǵy 284,7 gektar bolatyn Sarja» teńiz termınaly salynyp jatyr. Astyq, ámbebap júk, hımııalyq ónimder termınaldary men kólik-logıstıkalyq ortalyq qurylysy jalǵasyp jatyr.
Qorǵas týraly Qytaımen úkimetaralyq kelisimge ózgeris enedi.