«Aqtaý teńiz porty» AEA aýmaǵy 10 myń gektarǵa deıin ulǵaıtyldy
ASTANA. KAZINFORM — Qazaqstan Respýblıkasynyń Úkimeti 2026 jylǵy 13 naýryzda arnaıy ekonomıkalyq aımaqtarǵa qatysty ózgerister engizý týraly qaýly qabyldady, dep habarlaıdy Mańǵystaý ákimdiginiń baspasóz qyzmeti.
Qaýlyǵa sáıkes, «Aqtaý teńiz porty» arnaıy ekonomıkalyq aımaǵy Mańǵystaý oblysynda kólik-logıstıkalyq áleýetti damytý maqsatynda Munaıly aýdanynyń ónerkásiptik aımaǵynan (187 ga) jáne «Ersaı Kaspıan Kontraktor» JShS-nen (382,6148 ga) jalpy aýdany 569,6148 ga jer ýchaskelerin qosý arqyly ulǵaıtyldy. Osylaısha ekonomıkalyq aımaqtyń jalpy aýmaǵy 10 384,1178 gektarǵa jetti.
«Aqtaý teńiz porty» AEA Mańǵystaý oblysynyń aýmaǵynda, ıaǵnı Aqtaý jáne Jańaózen qalalarynyń, sondaı-aq Munaıly, Qaraqııa jáne Túpqaraǵan aýdandarynyń ákimshilik-aýmaqtyq shekaralary sheginde ornalasqan.
Sonymen qatar, AEA-nyń jańartylǵan aýmaqtyq jospary bekitildi. Qurylymy boıynsha:
— porttyq aımaq — 1038,9691 gektar;
— ındýstrııalyq aımaq — 7615,1487 gektar;
— logıstıkalyq aımaq — 1730 gektar.
Úkimet qaýlysymen 2052 jylǵa deıingi jańa maqsatty ındıkatorlar da aıqyndaldy. Atap aıtqanda, jalpy ınvestıtsııa kólemi 1720 mlrd teńgege deıin ulǵaıtylmaq. Taýarlar men qyzmetter óndirisiniń kólemi 1703 mlrd teńgeni quramaq.
Sondaı-aq AEA-ǵa qatysýshy kompanııalar sany 188-ge deıin ósedi, al qurylatyn jumys oryndarynyń sany 9900-ge jetedi dep kútilýde. Óndiristegi qazaqstandyq qamtý úlesi 83% deńgeıinde saqtalady.
Aıta keteıik, qaýly qol qoıylǵan kúnnen bastap kúshine endi.
Budan buryn Aqtaýda 2027 jyly iske qosylatyn bý-gaz qondyrǵysy 300-den astam jumys ornyn ashatynyn jazǵan edik.
