«Aqtaý teńiz porty» AEA-ǵa 15 jylda 98 mlrd teńge tartyldy
AQTAÝ. QazAqparat - «Aqtaý teńiz porty» arnaıy ekonomıkalyq aımaǵyna 15 jylda 98 mıllıard teńgege jýyq qarjy tartylyp, 1153 jumys orny quryldy, dep habarlaıdy QazAqparat.
Mańǵystaý oblysy ákiminiń baspasóz qyzmetinen málim etkendeı, aımaq basshysy Eraly Toǵjanov «Aqtaý teńiz porty» AEA aýmaǵynda ornalasqan birqatar nysannyń jumysymen tanysty.
«Teńiz portyndaǵy ekonomıkalyq aımaq qurylǵan sátten bastap shamamen 98 mlrd teńge tartyldy. 283 mlrd teńge somaǵa ónim óndirilse, 24,5 mlrd teńge mólsherinde bıýdjetke salyq tólendi. Sondaı-aq 1153 jańa jumys orny quryldy. Búgingi kúni arnaıy ekonomıkalyq aımaqta 28 joba tirkelgen, onyń ishinde 17-i turaqty jumys istep tur, 1 joba iske asyrylý satysynda. Taǵy 7 joba 2019-2020 jyldarǵa josparlanǵan», - delingen oblys ákimdiginiń resmı saıtynda.
AEA-da oblys basshysy aldymen, bolat óndiretin zaýyt «Bolat quıý ortalyǵy» JShS qurylysymen tanysty. Zaýyt qýaty 1 myń tonnaǵa deıin quıma buıymdar men ónerkásip sharýashylyǵynyń ár salasynda qoldanylatyn shoıyn men bolattan jasalǵan buıymdardy shyǵarady. Ónimder Qazaqstannyń ishki naryǵyna, sondaı-aq eksportqa baǵdarlanǵan.
Keıin E.Toǵjanov bıtým negizinde qatty jáne suıyq gıdrooqshaýlaǵysh materıaldar shyǵaratyn «SATEX CHEMIE» JShS men «Mańǵystaý ındýstrııalyq parkine» bardy. Indýstrııalyq aımaq 2017 jyldyń maýsym aıynda Aqtaý plastıkalyq zaýytynyń bazasynda qurylǵan. Kásiporynnyń ınfraqurylymy energııa resýrstaryn tranzıtteý, ónerkásiptik aǵyndardy tazartý jáne 20 sýbabonenttiń úzdiksiz jumys istep, kirme joldardy usyný úshin tartylǵan.
Oblys basshysy munaı jabdyqtaryn jóndeıtin «TehSnabTredıng» JShS men qasbetti qaptaý materıaldaryn daıyndaıtyn «Vest Dekor» JShS jumysymen de tanysty.
Qurylysy 2008 jyly bastalǵan «KOS-2» káriz sýyn tazartý kásipornynyń jaı-kúıi de belgili boldy. Nysannyń jobalyq-smetalyq qujattamasyna túzetýler engizilip, ýaqytyly qarjylandyrylmaǵandyqtan qurylys jumystary uzaqqa sozylǵan. Qazirgi ýaqytta 3,4 mlrd teńge somasyndaǵy qurylys-montajdaý jumystarynyń 98% aıaqtaldy. Endi iske qosý-jóndeý jumystary júrgizilýde. Tazartylǵan sýdyń 80% «Qoshqar Ata» sý qoımasyna quıylady. Ol shań-tozańnyń aldyn alyp, kóldiń aýmaǵyn arttyrmaq.
«Aldaǵy ýaqytta «KOS-1» den «KOS-2»-ge deıin 2 qubyrly kanalızatsııalyq jeli qurylysyn tartý qarastyrylýda. Bul «KOS-1» jumysyn toqtatyp, qalanyń sarqyndy sýlaryn tolyǵymen «KOS-2» tazalaýǵa múmkindik beredi. Osy maqsatta «KOS-2»-niń ekinshi kezeńin ázirleý úshin qýattylyǵy 40,0 myń m3/táýl bolatyn jobanyń smetalyq qujattamasy ázirlendi. Qazirgi kezde káriz sýyn tazartý jumysynyń qorytyndy qýaty - táýligine 70,0 myń tekshe metr. Ol qala muqtajyn tolyqtaı qanaǵattandyrady degen sóz. Aldaǵy ýaqytta tazartylǵan sýdy áýejaı men «Qoshqar Ata» kóliniń aınalasyndaǵy jasyl jelekterdi sýarý úshin paıdalanýǵa beriledi. Ol jumystar 2019 jyldyń naýryz aıynda aıaqtalady», - dedi ákim Eraly Toǵjanov.
Foto: www.portaktau.kz
