Aqtaý sý qubyry jelisiniń tozýyna baılanysty sýdyń 16 paıyzy ysyrap bolyp jatyr - Prezıdent

AQTAÝ. KAZINFORM - Memleket basshysy Qasym-Jomart Toqaevtyń tóraǵalyǵymen Mańǵystaý oblysynyń áleýmettik-ekonomıkalyq damýy jónindegi keńes ótip jatyr. Onda Prezıdent aımaqtaǵy sý qubyry men káriz jelisiniń tozýyn asa kúrdeli másele dep atady.

– Sarapshylar taza sýdyń taǵy bir kózi bar deıdi. Bul – Aqtóbe oblysyndaǵy Kókjıde jerasty sýlary. Ony ıgerýge qatysty jobany jan-jaqty pysyqtap, onyń ekonomıkalyq tıimdiligin zertteý qajet,- dedi Memleket basshysy.

Sondaı-aq Prezıdent sarapshylardyń Kókjıde, Aıshýaq jáne Soltústik Aıshýaq jerasty sýlarynan Mańǵystaý jáne Atyraý oblystarynyń eldi mekenderine deıin sý qubyryn tartýdy usynyp otyrǵanyn jetkizdi.

Sý qubyrynyń uzyndyǵy shamamen 1400 shaqyrym bolady, sý ótkizý múmkindigi – kúnine 170 myń tekshe metr. Sol arqyly 1,2 mıllıon adamdy taza aýyz sýmen qamtamasyz etýge jáne onyń kólemin arttyrýǵa múmkindik týady. Aqtaý qalasyndaǵy sý qubyry jelisi ábden tozǵan, tozý kórsetkishi – 77 paıyz. Sonyń kesirinen sýdyń 16 paıyzy ysyrap bolyp jatyr. Jalpy, aımaqtaǵy sý qubyry men káriz jelisiniń tozýy asa kúrdeli másele bolyp tur.

- Máselen, sý qubyry Aqtaýda jańa aıttym, 77 paıyz, Jańaózende – 59 paıyz tozǵan. Káriz jelisi Aqtaýda shamamen – 76 paıyz, Jańaózende – 72 paıyz tozǵan. Bir sózben, naqty sharalar qolǵa alynýy kerek. Al shalǵaıda turatyn malshylardyń óz betimen qudyq qazý týraly bastamasyna kelsek, bul – jalpy quptarlyq is. Bul jumysqa 100 mıllıon teńge qajet dep otyr. Keminde 50 malshy sýǵa qol jetkizedi eken. Qoldaýǵa bolady dep oılaımyn. Premer-mınıstrdiń orynbasary Qanat Bozymbaev ákimmen birlesip bul máseleni pysyqtaýy kerek, - dedi Memleket basshysy.

Osyǵan deıin Memleket basshysy oblystaǵy basty mindettiń biri — turǵyndardy taza aýyz sýmen qamtamasyz etý ekendigin aıtty.