Aqtaý stýdentterine TJ kezinde aman qalý amaldary úıretildi
AQTAÝ. QazAqparat - Aqtaýda stýdentter men mektep oqýshylary ınteraktıvtik sabaq kezeńin aıaqtady. Bul sabaqtar ártúrli TJ kezinde arnaıy daıyndyq áreketterine baǵyttalǵan. Qazirgi tańda túrli jastaǵy 24 myńnan astam bilim alýshy atalmysh kýrstan ótti, dep habarlaıdy «QazAqparat» HAA tilshisi.
TJ departamenti mektep oqýshylaryna arnalǵan ınteraktıvtik sabaqtardy 2009 jyldan beri 7 jyl qatarynan ótkizip keledi. Bir jylda túrli mektepterdegi 24 myń 355 mektep oqýshysyna ótkizildi. Al, stýdentterge arnalǵan arnaıy daıyndyqtar bıyl alǵash ret boldy.
«Sabaqtardy Mańǵystaý oblystyq TJD qyzmetshileri, Apattyq medıtsına ortalyǵynyń mamandary júrgizdi. Mýltımedııalyq quraldar, medıtsınalyq oqý manekenderi qoldanyldy. Bilim alýshylar alǵashqy medıtsınalyq kómek berýdi úırendi. Jer silkinisi, muzda jáne sýda ózderin qalaı ustaý kerektigin uǵyndy», - dep aıtty Mańǵystaý oblystyq tótenshe jaǵdaılar departamenti baspasóz qyzmetiniń mamany Gúlnara Qojabekova.
Ol kýrstyń basty maqsaty tek qana úıretip, aqparat berip qana qoımaı, kommýnıkatıvtik qabiletterin arttyryp, alǵan bilimderin paıdalanýǵa baǵyttalǵanyn atap ótti. Sh.Esenov atyndaǵy Kaspıı memlekettik tehnologııa jáne ınjınırıng ýnıversıtetiniń 85 stýdenti kýrsty meńgergen. Kelesi jyly stýdenttermen jumys jalǵasyn tabady.
