Aqtaý sammıtine arnalǵan baspasóz ortalyǵy jumysyn bastady

AQTAÝ. QazAqparat - Búgin Kaspıı mańy memleketteriniń besinshi sammıtine oraı 400-den astam orynǵa laıyqtalǵan baspasóz ortalyǵy óz jumysyn bastady, dep habarlaıdy QazAqparat. 

Bul ortalyq Sammıt ótetin «Dostyq úıine» qarama-qarsy ornalasqan Sh. Esenov atyndaǵy Kaspıı memlekettik tehnologııalar jáne ınjınırıng ýnıversıtetiniń sport kesheninde jasaqtaldy. 

Aldyn ala málimet boıynsha, Qazaqstan tarapynan 150-den astam, al shetelden 200-den artyq tilshiler Aqtaý sammıtine tirkeýden ótken. 

Atap aıtqanda, qazirgi sátte baspasóz ortalyǵyna Kaspıı mańy elderi quramyndaǵy Qazaqstan, Ázerbaıjan, Iran, Reseı jáne Túrkimenstan elderiniń iri buqaralyq aqparat quraldary jınaldy.

Sonymen Aqtaý sammıtinen aqparat taratý úshin shaharǵa Eýropa men arab elderiniń, AQSh-tyń, Qytaıdyń bedeldi telearnalary, aqparat agenttigi ókilderi keldi. 

Budan buryn habarlanǵandaı, búgin Kaspıı mańy memleketteriniń besinshi sammıtine qatysý úshin kórshiles elderdiń prezıdentteri Aqtaýǵa keldi.