Aqtaý sammıti: Reseı men Iran prezıdentteri ulttyq múdde týraly pikir bildirdi
AQTAÝ. QazAqparat - Búgin Aqtaý sammıtinde bes eldiń múddeleri eskerildi. Bundaı pikirdi Reseı Prezıdenti Vladımır Pýtın men Iran Prezıdenti Hasan Rýhanı aıtty, dep habarlaıdy QazAqparat.
«Bul halyqaralyq kelisim (Konventsııa) bizdiń ortaq qundylyǵymyz bolyp otyrǵan Kaspııdi paıdalaný men saqtaý turǵysynda tyńǵylyqty ári kólemdi erejeler men mindettemeler jıyntyǵyn qamtyp otyr. Osy arqyly Kaspıı bestiginiń ózara is-qımyly zamanaýı zańdy negizge qol jetkizdi. Eń bastysy, qujat teńizdiń beıbit mártebesin qamtamasyz etýde», - dep toqtaldy V. Pýtın.
Onyń sózine qaraǵanda, Konventsııada qamtylǵan talaptardy Kaspıı mańy memleketteri kóp jyldan beri pysyqtap keldi.
«Osy strategııalyq qujat aıasynda bes eldiń kóptegen vedomstvolarynyń aýqymdy kelissózderi júrgizildi. Bul rette sarapshylyq ári isker toptar da nazardan tys qalmady. Kaspıı mańy elderi kóshbasshylarynyń ózara túsinistiginiń arqasynda barlyǵynyń múddeleri eskerilgen ýaǵdalastyqqa qol jetkizdik», - dedi RF basshysy.
Onyń paıymynsha, Aqtaý sammıtinde qol qoıylǵan konventsııa bes eldiń arasyndaǵy qatynastarda jańa kezeńdi ashyp otyr.
«Aldymyzda kúrdeli ári qyzyqty maqsattar men mindetter tur. Biz bul máselelerdi dáıekti túrde sheshýge nıettimiz. Jalpy, eleýli jumystary úshin Qazaqstan tarapyna alǵysymyzdy jetkizemiz. Barlyq áriptesterimdi Sammıttiń tabysty ótýimen quttyqtaımyn», - dedi Vladımır Pýtın.
Óz kezeginde Iran Prezıdenti Hasan Rýhanı Konventsııany bekitý - Kaspıı mańy memleketteri úshin mańyzdy ekenin málim etti.
«Bizdiń qatynastar dostyq negizde jalǵasyp jatyr. Sondyqtan bul qarym-qatynastarymyz ýaǵdalastyqqa qol jetkizýdiń basty faktory boldy», - dedi ol.
Munymen qosa, Iran basshysy barlyq elderdiń ulttyq múddeleri eskerilgenin qadap aıtty.
Budan buryn habarlanǵandaı, Aqtaý sammıtine qatysqan bes eldiń basshylary Kaspııdiń quqyqtyq mártebesi týraly konventsııaǵa qol qoıdy.
Kaspıı mańy memleketteriniń besinshi sammıtinen keıin Elbasy Nursultan Nazarbaev Kaspıı teńiziniń quqyqtyq mártebesi týraly konventsııanyń mańyzdylyǵyn túsindirdi.
