Aqtaý sammıti Kaspıı teńizindegi týrızmdi damytýǵa yqpal etti
PETROPAVL. QazAqparat - Soltústik Qazaqstan oblysy ańshylyq týrızm úshin tartymdy. Bul týraly Qazaqstan men Reseıdiń Óńiraralyq yntymaqtastyǵynyń XV forýmynda QR Mádenıet jáne sport mınıstri Arystanbek Muhamedıuly málim etti, dep habarlaıdy QazAqparat.
«Kaspıı teńizindegi týrızmdi damytý úshin bıyl tamyzda Aqtaýda ótken Kaspıı mańy memleketteriniń tarıhı sammıti eleýli úles qosty. Aqtaý sammıti barysynda memleket basshylary Kaspıı teńizi aýmaǵyn damytý áleýetine qatysty usynystaryn aıtty. Osy oraıda atalǵan aımaqta transshekaralyq teńiz krýızderi týrıster úshin asa tartymdy bolady», - dep toqtaldy A. Muhamedıuly.
Onyń sózine qaraǵanda, jaqynda ornalasqan iri halyqaralyq porttar Túrkimenstanda, Ázerbaıjanda, Iranda ekenin eskere otyryp, teńiz ınfraqurylymyn jańartý qajettiligi bar. Bul rette eki el aýmaǵynda teńiz porttarynyń jańa jolaýshylar termınaldaryn ashý kerek.
«Nursultan Ábishuly, Sizdiń tapsyrmańyz boıynsha Mańǵystaý oblysynda álemdik standarttarǵa saı jaǵajaı demalys aımaqtaryn qurý jumystary bastaldy», - dedi mınıstr.
Budan bólek A. Muhamedıuly Soltústik Qazaqstan oblysy óziniń biregeı qoryqtyq aımaqtarymen ekologııalyq ári ańshylyq týrızm úshin tartymdy ekenin atap ótti.
«Álemdik úzdik tájirıbege súıene otyryp, ulttyq tabıǵı parkter men qoryqtar barynsha ashyq bolǵany jón. Mysaly, Kanadadaǵy «Park Banf» ulttyq tabıǵı parki jylyna 5 mıllıonnan astam týrısti qabyldaıdy. Jańa Zelandııada ańshylyq sharýashylyqtardyń jyl saıynǵy tabysy 900 mln dollardy qurap otyr, al Ispanııada 84 mln dollar shamasynda», - dedi vedomstvo basshysy.
Osy oraıda ol bul baǵytta túsken qomaqty qarjy parkterdi damytýdy, sondaı-aq bıoresýrstardy qalpyna keltirýdi qamtamasyz etetinin jetkizdi. Bul turǵyda aldaǵy jyldan bastap Aýyl sharýashylyǵy mınıstrligimen birlese ańshylyq alqaptar men ulttyq parkterdi basqarýdyń jańa modelin aprobatsııadan ótkizý josparlanyp otyr.
