Aqtaý prokýratýrasy úlestik qurylysqa qatysty málimdeme jasady

ASTANA. KAZINFORM – Aqtaý qalasynyń prokýrory Daýylbaı Shelpekov turǵyndardy kóppáterli turǵyn úılerdiń qurylysyna jáne úlestik qatysý sharttarymen páter satyp alýǵa qatysty saq bolýǵa shaqyrdy.

Prokýratýra málimetinshe, sońǵy ýaqytta Aqtaý qalasynda kóppáterli turǵyn úılerdiń qurylysyna baılanysty turǵyndardyń narazylyǵy jıilegen. Negizgi máseleler úlestik qurylys salasynda jáne aıaqtalmaǵan nysandardyń jylý, aýyz sý men elektr jelilerine qosylmaýyna qatysty bolyp otyr.

Prokýrorlyq qadaǵalaý organy turǵyn úı salýǵa berilgen ruqsat páter satýǵa ruqsat bolyp sanalmaıtynyn eskertti. Bul eki túrli quqyqtyq qujat.

- Qoldanystaǵy «Turǵyn úı qurylysyna úlestik qatysý týraly» zańǵa sáıkes, qurylys júrgizý kezeńinde páter satý tek Qazaqstan Turǵyn úı Kompanııasynyń nemese ákimdiktiń tıisti ruqsaty bolǵan jaǵdaıda ǵana zańdy. Ózge jaǵdaılarda úlestik negizde páter satýǵa tyıym salynady, - dedi baqylaýshy organ ókili.

Sonymen qatar qala aýmaǵynda paıdalanýǵa qabyldanbaǵanyna qaramastan, turǵyndar qonystanyp alǵan kóppáterli úıler bar ekeni atap ótildi. Bul jaǵdaı úılerdi ınjenerlik jelilerge qosýǵa kedergi keltirip otyr.

- Zańnamaǵa sáıkes, azamattardy kóppáterli turǵyn úıge qonystandyrý qurylys tolyq aıaqtalyp, paıdalanýǵa qabyldaý aktisi alynǵannan keıin ǵana júzege asyrylady. Qabyldaý aktisi joq turǵyn úıge qonystandyrý zańsyz sanalady jáne ákimshilik nemese qylmystyq jaýaptylyqqa ákep soǵýy múmkin, - dep eskertti prokýror.

Osyǵan baılanysty prokýratýra azamattarǵa páter satyp almas buryn turǵyn úıdiń zańdylyǵyn ákimdikten nemese onyń resmı aqparat kózderinen mindetti túrde tekserýge keńes beredi.

Prokýratýra zań talaptarynyń saqtalýyn qatań baqylaýda ustaıtynyn málimdedi.

Aıta keteıik, 2026 jyly úlesker retinde alǵan páterin satqandardyń bir bóligi salyqtan bosatylady.