Aqtaý portynyń túbin tereńdetý jumysyn bastaý kerek – senator

ASTANA. KAZINFORM — Qazaqstannyń kólik-logıstıkalyq áleýetine sońǵy jyldary Kaspıı teńizi deńgeıiniń tómendeýi eleýli problemaǵa aınaldy. Senator Súıindik Aldashev Úkimet basshysynyń atyna joldaǵan depýtattyq saýalynda bul másele porttardyń jumysyna jáne olardyń tıimdiligine teris áser etetinin atap ótti.

- Aqtaý porty akvatorııasynda teńiz túbin tereńdetý» jobasy Teńiz ınfraqurylymyn damytýdyń 2024-2028 jyldarǵa arnalǵan keshendi josparyna engizilgen jáne quny 42 mlrd teńgeni quraıtyn jobalyq smetalyq qujattama jasaqtalyp, saraptamanyń oń qorytyndysy alyndy. Quny 20 mlrd teńge quraıtyn joba 2025 jyly bastalýy tıis. Alaıda, qazirgi kezde bul baǵytta jumystyń atqarylýyna qarajat kózi qaralmaǵany anyqtalyp otyr. Bul óz kezeginde jobanyń ýaqytynda iske aspaı qalýyna áserin tıgizip otyr», - dedi S. Aldashev.

Senatordyń aıtýynsha, qarjylandyrýdyń bolmaýy elimizge strategııalyq mańyzdy jobany júzege asyrýǵa kedergi keltirýi múmkin. Qaýipsiz navıgatsııany qamtamasyz etý, júk aǵynyn arttyrý jáne marshrýttaǵy kedergilerdi joıý úshin túbin tereńdetý qajet. Bul sharalar atqarylmasa, Transkaspıı marshrýtynyń turaqtylyǵyna qaýip tónedi, al Qazaqstannyń tranzıttik áleýeti júzege aspaı qalady.

- Joǵaryda aıtylǵan máseleniń mańyzdylyǵyn eskere otyryp, Aqtaý porty akvatorııasy teńiz túbin tereńdetýdiń birinshi kezeńi jumystaryn ýaqytynda atqarý maqsatynda jobany qarjylandyrýǵa qarajat bólýge yqpal etýińizdi suraımyz. Bul óz kezeginde elimizdiń kólik logıstıkalyq áleýetin arttyrý baǵytynda zor múmkindik beredi dep senemiz, - dedi depýtat.

Eske salsaq, Aqtaýda TMD-da teńdesi joq áýe habyn qurý josparlanyp otyr.