Aqtaý portynyń áleýetin 3 ese arttyratyn hab salynyp jatyr
ASTANA. KAZINFORM – «Aqtaý teńiz porty» arnaıy ekonomıkalyq aımaǵynda polıpropılen qapshyqtar men qap shyǵaratyn, qubyr óndiretin zaýyttar jumys istep tur. Budan bólek Aqtaý halyqaralyq teńiz portynyń bazasynda iri konteınerlik hab salynyp jatyr.
Polıpropılen qapshyqtar men qap shyǵaratyn zaýytty 2022 jyly WestEcoPlast kásiporny iske qosqan bolatyn.
– Zaýyttyń óndiristik qýaty jylyna 6 mln qaptama shyǵarýǵa qaýqarly. Bolashaqta bul kórsetkishti eki esege deıin arttyrýdy josparlap otyrmyz. Bul ónimder Mańǵystaý oblysy ǵana emes, Batys Qazaqstan, Aqtóbe jáne Qyzylorda oblysynyń naryǵyna da shyǵady. Óndiriste 100-ge jýyq jergilikti turǵyn tórt aýysymmen eńbek etip júr, - deıdi zaýyt dırektory Kırıll Demchenko.
«Aqtaý teńiz porty» arnaıy ekonomıkalyq aımaǵynda qubyr óndirisindegi álemdik kóshbasshy sanalatyn Tenaris kompanııalar tobynyń enshiles kásiporny da óndiris uıymdastyryp otyr. Kompanııanyń enshiles kásiporny 2016 jyldan beri jumys istep keledi. Bıyl óz ónimderin Ózbekstanǵa eksporttaı bastady.
Seriktestiktiń bas dırektory Andreı Pılıpenkonyń aıtýynsha, zaýytta 40-qa jýyq jergilikti turǵyn jumys isteıdi.
– Bul – elimizdegi biregeı kásiporyn. Zaýyt premıým-klassty soraptyq-kompressorlyq qubyrlardy maısyz jabyndysymen shyǵarady. Atalǵan tehnologııa qubyrlardy paıdalaný protsesin jeńildetip, tapsyrys berýshilerdiń jumys tıimdiligin arttyrady. Biz elimizdegi iri munaı-gaz operatorlary úshin senimdi serikteske aınaldyq, - deıdi ol.
Kompanııa jyl saıyn Aqtaý men Jańaózen qalalaryndaǵy bilim berý salasyn qoldaýǵa arnalǵan jobalardy júzege asyryp keledi.
Aqtaý halyqaralyq portynyń bazasynda zamanaýı konteınerlik hab salynyp jatqanyn sóz basynda aıttyq. Jobany Qazaqstan men Qytaıdyń birlesken kompanııasy júzege asyryp jatyr. Kompanııa bas dırektorynyń kommertsııa jónindegi orynbasary Qaırat Qalıollanyń sózinshe, qurylystyń birinshi kezeńi 2026 jyldyń basynda aıaqtalýy kerek.
Qazir Aqtaý porty jylyna 70 myń konteıner óńdese, habtyń arqasynda teńiz arqyly tasymaldanatyn júk kólemi 3 esege jýyq óspek. Óıtken jańa habta jabyq jáne tońazytqysh konteınerlerge arnalǵan qoımalar bolady. Bul konteınerdegi júkti jyldam óńdeýge múmkindik beredi.
Buǵan deıin Kaspıı teńiziniń tartylýy — Aqtaý halyqaralyq teńiz saýda portynyń jumysyna keri áserin tıgize bastaǵanyn jazǵan edik.