Aqtaý portynda júk tasymaldaıtyn 8 keme salynady
ASTANA. KAZINFORM — Aqtaý portynyń konteıner ótkizý qýatyn jylyna 240 myń DFE-ge deıin arttyrý josparlanyp otyr. Bul úshin port ınfraqurylymy jańǵyrtylyp, jańa termınaldar salynady. Sonymen qatar Kaspıı teńizinde júk tasymaldaıtyn segiz keme jasaýǵa tapsyrys berilgen.
Bul týraly QR kólik vıtse-mınıstri Jánibek Taıjanov Astanada ótip jatqan TransLogistica Kazakhstan 2026 halyqaralyq kórmesinde aıtty.
Qazir Aqtaý portynyń konteıner óńdeý qýaty jylyna 180 myń DFE quraıdy. Jańǵyrtýdyń ekinshi kezeńi aıaqtalǵannan keıin bul kórsetkish 240 myń DFE-ge deıin jetedi dep josparlanyp otyr.
Jánibek Taıjanovtyń aıtýynsha, tapsyrys berilgen segiz kemeniń tórteýi Bakýde, qalǵan tórteýi Qytaıda salynyp jatyr. Budan bólek, halyqaralyq logıstıkalyq kompanııalarmen birlesip, jańa termınaldar salý jobalary qarastyrylýda.
— Sheteldik seriktestermen jańa termınaldar salý jobalaryn pysyqtap jatyrmyz. Bul porttardyń júk qabyldaý jáne ótkizý múmkindigin odan ári arttyrýǵa baǵyttalǵan, — dedi vıtse-mınıstr.
Aqtaý jáne Quryq porttary Qytaıdan Eýropaǵa júk jetkizetin Transkaspıı halyqaralyq kólik dáliziniń mańyzdy bóligi sanalady. Bul baǵytta júkter Qazaqstan aýmaǵymen temirjol arqyly tasymaldanyp, Kaspıı teńizi arqyly Ázerbaıjanǵa, odan ári Eýropaǵa jetkiziledi. Porttardyń ótkizý qýatyn arttyrý halyqaralyq júk aǵynyn qabyldaý múmkindigin keńeıtýge yqpal etedi.
Aıta keteıik, TransLogistica Kazakhstan 2026 halyqaralyq kórmesi 14–16 qazan aralyǵynda Astanadaǵy EXPO halyqaralyq kórme ortalyǵynda ótip jatyr. Bıyl oǵan 20 elden 230 kompanııa qatysýda. Kórmede kólik ınfraqurylymy, temirjol jáne teńiz tasymaly, qoıma logıstıkasy men júk óńdeý tehnologııalary tanystyrylyp jatyr.
