Aqtaý portynda júk kóligi teplovozben soqtyǵysty
ASTANA. KAZINFORM — 2 qarashada saǵat 16:55–te Aqtaý teńiz portynyń kirme jolyndaǵy kúzetilmeıtin ári rettelmeıtin temirjol ótkelinde júk kóligi teplovozben soqtyǵysty.
Aldyn ala málimet boıynsha, «MAZ» júk kóliginiń júrgizýshisi shamamen 5 shaqyrym/saǵ jyldamdyqpen keri baǵytta kele jatqan teplovozǵa jol bermegen. Oqıǵa saldarynan zardap shekkender joq.
Soqtyǵysýdan teplovoz edáýir tehnıkalyq zaqym aldy. Oqıǵa týraly Mańǵystaý stantsııasyndaǵy jelilik polıtsııa bólimine habarlandy.
— Aldyn ala boljam boıynsha, jol-kólik oqıǵasyna júk kóligi júrgizýshisiniń Jol qozǵalysy erejelerin buzýy sebep bolǵan, — dep habarlady QTJ baspasóz qyzmeti.
QTJ júrgizýshilerdi temirjol ótkelderinen ótý kezinde muqııat bolýǵa, jol belgileri men sıgnaldarynyń talaptaryn saqtaýǵa jáne poıyzdarǵa jol berýge úndedi.
Kompanııa ókilderi qozǵalys qaýipsizdigi ár júrgizýshiniń tártibine baılanysty ekenin eske saldy.
