Aqtaý portynda zamanaýı konteınerlik hab salynyp jatyr

AQTAÝ. KAZINFORM — Aqtaý portynda zamanaýı konteınerlik habtyń qurylysy belsendi júrgizilip jatyr. Bul týraly Temirjol jáne sý kóligi komıteti málim etti.

Aýqymdy joba 2024 jyly «China Harbor Engineering Co. » jáne «Integra Construction KZ» JShS konsortsıýmy bastamasymen qolǵa alynǵan jáne ony Qazaqstannyń kólik ınfraqurylymynyń mańyzdy bóligine aınaldyrý josparlanyp otyr.

Nysanda 24 gektar aýmaq tazartylyp, 313 myń tonnadan astam topyraq jetkizildi. Vertıkaldy josparlaý jumystarynyń 65%-y aıaqtalyp, qurylys qarqyndy júrip jatyr.

Qurylys jumystaryna 100-den astam arnaıy tehnıka jumyldyrylyp, táýlik boıy eki aýysymda 12 saǵattan jumys júrgizilýde. Bul qurylys barysyn tolyq baqylaýǵa jáne dınamıkany qamtamasyz etýge múmkindik beredi.

Kólik mınıstrligi konteınerlik hab qurylysyn únemi baqylaýda ustap otyr. Temirjol jáne sý kóligi komıteti jobanyń belgilengen standarttary men merzimderge saı bolýyn qamtamasyz ete otyryp, barlyq protsesterdi úılestirýge belsendi qatysady.

Eske sala keteıik, buǵan deıin bıyl Aqtaý portynan 6,8 mln tonna júk tasymaldanǵanyn jazǵan bolatynbyz.