Aqtaý portynda teńiz túbin tereńdetý jumystary jedeldetiledi
ASTANA. KAZINFORM — Transkaspıı baǵytyn damytý úshin Aqtaý portynda teńiz túbin tereńdetý qolǵa alyndy, dep habarlaıdy Kólik mınıstrliginiń baspasóz qyzmeti.
Kólik mınıstrliginde vıtse-mınıstr Jánibek Taıjanovtyń tóraǵalyǵymen Aqtaý porty akvatorııasyn tereńdetý jobasy boıynsha keńes ótti.
Keńeske «Qazaqstan temir joly» UK» AQ, «Aqtaý halyqaralyq teńiz saýda porty» UK» AQ ókilderi, sondaı-aq merdiger uıym — «China Harbour Engineering Company Ltd» kompanııasynyń ókilderi qatysty.
Kezdesý barysynda jobany iske asyrýdyń ózekti máseleleri men daıyndyq jumystarynyń barysy qaraldy.
Merdiger uıymnyń málimetinshe, qazir arnaıy tehnıkalardy jumyldyrý jáne topyraq úıindileri kartalary boıynsha qurylys alańyn daıyndaý jumystary qarqyndy júrgizilip jatyr.
— Keńes qorytyndysy boıynsha teńiz túbin tereńdetý jumystaryn jedeldetýdi jáne jobany ýaqytyly iske asyrý boıynsha naqty tapsyrmalar berildi. Jobany júzege asyrý Transkaspıı halyqaralyq kólik baǵytynyń ótkizý qabiletin arttyrýǵa jáne Qazaqstannyń teńiz logıstıkasynyń tıimdiligin arttyrýǵa múmkindik beredi, — delingen mınıstrlik taratqan aqparatta.
Osyǵan deıin Aqtaý portynyń áleýetin 3 ese arttyratyn hab salynyp jatqanyn jazdyq.
