Aqtaý portynda teńiz vokzalyn salý qajet – Nurgúl Taý
ASTANA. KAZINFORM – Bul týraly Májilistiń jalpy otyrysynda Týrızm jáne sport mınıstrine depýtattyq saýal joldaǵan Nurgúl Taý aıtty.
«Qazirgi tańda álemdik ekonomıkadaǵy týrızmniń úlesi 9,2 paıyzdy qurap, 9,5 trln dollarǵa jetti. Al, Qazaqstannyń týrızm salasy ekonomıkanyń tek 3,9 paıyzyn ǵana alyp otyr. Búgingi tańda, Qazaqstanda týrızm salasynyń damýyna kedergi jasap otyrǵan birqatar túıtkildi másele bar. Birinshiden, bul – týrıstik ınfraqurylymnyń álsizdigi. Atap aıtqanda, týrıstik aýmaqtar tamaqtaný jáne gıgıenalyq oryndarmen tıisti deńgeıde qamtylmaǵan. Budan bólek, logıstıka máselesi bar. Mysaly, týrısterdiń kóptep baratyn jerine aınalǵan Alakólge aparatyn poezdyń jaǵdaıy jan túrshiktiredi. Sondaı-aq, shalǵaı týrıstik mekenderde sapaly baılanystyń joq ekeni de belgili. Atalǵan máseleni sheshý úshin memlekettik-jekemenshik áriptestikti qoldana otyryp, avtomagıstraldardyń ár 100 shaqyrymynda tolyǵymen qamtylǵan qonaq úı ashý qajet. Bul úrdis birqatar Eýropalyq elderde keńinen taralǵan», - dedi ol.
Onyń aıtýynsha, ekinshiden, Qazaqstanda 2021 jyldan bastap Týrızm men sportty qoldaý bıýdjetten tys qory jumys istep keledi. Qordyń múlikti paıdalaný týraly esepterine sáıkes, 2021-2022 jyldary 51 mlrd teńge tek sport salasyna ǵana bólingen. Al, týrızmdi damytýǵa múldem qarajat bólingen joq. Sondaı-aq, qordyń Jarǵysyna týrızmdi damytýǵa qatysty ereje tek ótken jyly ǵana engizilgen.
«Osyǵan baılanysty atalǵan qordan bólip shyǵarý arqyly «Týrıstik salany damytý qoryn» qurýdy qarastyrýyńyzdy suraımyn. Bul týrıstik salaǵa bólinetin qarajattyń tıimdi jumsalýyn arttyrady dep senemin. Úshinshi másele – qolóner salasyndaǵy kásipkerliktiń baıaý damýy. Buǵan sebep – sheberhanalar men qolóner týyndylaryn týrısterge satýǵa arnalǵan biregeı alańnyń joqtyǵy. Osyǵan oraı, basym týrıstik aýmaqtarda qolónershiler ortalyqtaryn ashý jáne ózara ıntegratsııalanǵan qolóner marketpleısin qurý usynylady. Tórtinshiden, Qazaqstandyq týrızmniń tartymdylyǵyna kóp kóńil bólý qajet. Osyǵan qatysty mınıstrlikterińizdi iri sheteldik kompanııalarmen, onyń ishinde CNN, EuroNews, BBC telearnalary, Netflix, Amadeus aǵyndyq alańdarymen yntymaqtastyq ornatýǵa shaqyramyn. Sondaı-aq, elge birinshi ret kelgen týrısterge tegin baılanys kartalaryn berý usynylady. Besinshiden, búgingi tańda saıahattaýdyń tanymal túri bolyp tabylatyn keme krýızi salasynda ózgerister joqtyń qasy. Degenmen, Qazaqstan úshin Kaspıı teńizi bul salany damytýǵa jaqsy múmkindik beredi. Osyǵan qatysty, Aqtaý portynda teńiz vokzalyn salý jáne osyǵan qatysty ınfraqurylymdy qurý máselesin qarastyrýdy suraımyn», - dedi Nurgúl Taý.
Depýtattyń atap ótýinshe, altynshydan, qazir elge kelgen sheteldik týrıst Google izdeý júıesine «Qazaqstannyń kórnekti oryndary» dep aǵylshynsha terse, birinshi 10 siltemeniń arasynan qazaqstandyq resmı saıtty taba almaıdy.
«Bizde bar eQonaq qosymshasyn qazaqsha «qonaq» sózin túsinbeıtin týrıst Google izdeý júıesinde qaıdan tabady? Sondyqtan osy máseleni de qolǵa alý usynylady. Jetinshiden, Eńbek kodeksine sáıkes jumysker vahtalyq jumysta 30 kún bolsa, taǵy 30 kún demalýy tıis. Degenmen, kóptegen týrısttik obektiler jylyna 90 kún ǵana isteıdi. Sondyqtan, kásipkerler bir orynǵa jylyna keminde eki jumysker aýystyrýǵa májbúr. Bul týrıstterge kórsetiletin qyzmet sapasyna keri áserin tıgizip qana qoımaı, kásipkerlerge qosymsha shyǵyn ákeledi. Bul máseleni sheshý úshin týrısttik salanyń ereksheligin eskere otyryp, qarastyrýdy usynamyn», - dedi ol.
