Aqtaý portynda teńiz túbin tereńdetý jumystary jyl sońyna deıin aıaqtalady
AQTAÝ. KAZINFORM — Aqtaý halyqaralyq teńiz saýda portynda teńiz túbin tereńdetý jumystary júrgizilip jatyr. Joba aıasynda 1,3 mln tekshe metr topyraq shyǵarylyp, port akvatorııasynyń tereńdigi 6-7 metrge deıin ulǵaıtylady.
Bul týraly «Aqtaý halyqaralyq teńiz saýda porty» UK» AQ Kazinform saıtynyń resmı saýalyna bergen jaýabynda málimdedi. Kompanııanyń málimetinshe, jumystardy Qytaıdyń China Harbour Engineering Company Ltd (CHEC) kompanııasy atqaryp jatyr. Geodezııalyq izdenisterden bastap topyraqty shyǵarýǵa deıingi jumystardy qytaılyq merdiger oryndaıdy.
Túpti tereńdetý jumystary porttyń akvatorııasyn, sonyń ishinde kireberis arnalar men aılaqtar mańyndaǵy operatsııalyq aımaqty qamtıdy. Jobanyń jalpy aýmaǵy — 77,1 gektar.
— Kaspıı teńiziniń tartylýyna baılanysty aılaqtar mańyndaǵy tereńdik 4,5–5 metrge deıin tómendegen. Jumystar aıaqtalǵannan keıin port akvatorııasynyń tereńdigi 6–7 metrge deıin jetkiziledi. Bul kemelerdiń qajetti shógý tereńdigin qamtamasyz etip, olardyń tolyq júkpen kirýine múmkindik beredi, — delingen kompanııanyń jaýabynda.
Shyǵarylǵan topyraq arnaıy ýchaskelerge tasymaldanyp, jańa aılaqtar salýǵa arnalǵan jasandy aýmaq qalyptastyrý úshin paıdalanylady.
Joba porttyń ótkizý qabiletin arttyrýǵa jáne Transkaspıı halyqaralyq kólik baǵytyn damytýǵa baǵyttalǵan. Kompanııanyń málimetinshe, jumystar aıaqtalǵannan keıin Ortalyq dáliz boıynsha tasymal kólemin 30 paıyzǵa deıin arttyrý kózdelgen. Al 2028 jylǵa qaraı baǵyttyń ótkizý qabiletin jylyna 6 mln tonnadan 10 mln tonnaǵa deıin jetkizý josparlanyp otyr.
Sonymen qatar kemelerdi tolyq júkteý múmkindigi teńiz arqyly júk tasymaldaý qunyn shamamen 10–15 paıyzǵa tómendetýge yqpal etedi dep kútilýde.
Jobanyń quny — 20,6 mlrd teńge. Qarjylandyrý qaryz qarajatyn tartý arqyly júzege asyrylady, al jobany Qazaqstan Úkimeti men Kólik mınıstrligi úılestiredi.
Teńiz túbin tereńdetý jumystarynyń birinshi kezeńi kóktemde bastalǵan. Jobany 2026 jyldyń sońyna deıin aıaqtaý josparlanyp otyr.
Buǵan deıin Aqtaý portynda sý túbin tereńdetý jumystary bastalǵanyn jazǵan edik.
