Aqtaý portynda sý túbin tereńdetý jumystary bastaldy
AQTAÝ. KAZINFORM – Aqtaý halyqaralyq teńiz saýda portynda Kaspıı teńizi deńgeıiniń tómendeýine baılanysty sý túbin tereńdetý jumystary bastaldy. Bul týraly QR Kólik mınıstrligi habarlady.
Joba port ınfraqurylymynyń turaqty jumysyn qamtamasyz etip, Transkaspıı halyqaralyq kólik baǵyty (THKB) boıynsha júk tasymalynyń tıimdiligin arttyrýǵa baǵyttalǵan.
Jumys barysynda port akvatorııasynan shamamen 1,3 mln tekshe metr topyraq alý josparlanǵan. Bul akvatorııanyń tereńdigin 6-7 metrge deıin ulǵaıtýǵa múmkindik beredi.
Mamandardyń aıtýynsha, joba porttyń ótkizý qabiletin arttyryp, Transkaspıı halyqaralyq kólik baǵyty boıynsha tasymal kólemin 30%-ǵa deıin ulǵaıtýǵa múmkindik beredi. Sonymen qatar teńiz arqyly júk tasymaldaý quny shamamen 10-15%-ǵa tómendeýi múmkin.
Sý túbin tereńdetý jumystary teńizde júzý qaýipsizdigin arttyryp, port ınfraqurylymyna ınvestıtsııa tartýǵa da yqpal etedi.
Qazir merdiger kompanııa jumystardy oryndaý kestesin ázirlegen. Jobany belgilengen merzimge sáıkes iske asyrý úshin turaqty jumys keńesteri ótkizilip, týyndaǵan máseleler jedel sheshilýde.
Sý túbin tereńdetý jumystaryn 2026 jyldyń sońyna deıin aıaqtaý josparlanǵan.
Buǵan deıin, Mańǵystaýda Quryq portyndaǵy jańǵyrtý jumystary júrip jatqanyn jazǵan bolatynbyz.
