Aqtaý porty arqyly «QazAzot» ónimi alǵash ret álemdik naryqqa eksporttaldy
AQTAÝ. KAZINFORM – Búgin Aqtaýdaǵy «QazAzot» zaýytynda óndirilgen ónimniń jóneltilimi alǵash ret Kaspıı teńizi jáne Ázirbaıjan aýmaǵyndaǵy Govsan porty arqyly Grýzııadaǵy Batýmı teńiz portynda aýystyryp tıeýmen júzege asyryldy.
Aldaǵy ýaqytta Aqtaýda óndirilgen ammıak selıtrasy kólik-logıstıkalyq tizbek nátıjesinde búkil álem boıynsha sońǵy tutynýshylarǵa jóneltiletin bolady.
Bul tasymaldaý QR Kólik mınıstrligi men Mańǵystaý oblysy ákimdiginiń, Transkaspıı halyqaralyq kólik marshrýtynyń, «Aqtaý teńiz saýda porty» UK» AQ, «Qazteńizkólikfloty» UTKQK» JShS, «Kasqor-Transservıs» AQ, ADY Express, «Batýmı teńiz porty» JShQ qoldaýymen júzege asyrylady. Sonymen qatar jóneltýshi kompanııanyń eksporttyq áleýetin ártaraptandyrýǵa múmkindik bermek.
«2024 jyly ammıak selıtrasyn 50 000 tonnadan astam kólemde Transkaspıı halyqaralyq kólik marshrýty boıynsha Potı jáne Batýmı porttaryna jóneltý josparlanyp otyr. Bul marshrýtty paıdalaný kásiporyn úshin jańa halyqaralyq naryqtarǵa ammıak selıtrasyn jetkizýge jáne qazaqstandyq taýardyń búkil álemge tanylýyn arttyrýǵa múmkindik beredi», — dep jazylǵan «QazAzot» AQ habarlamasynda.
Osyǵan deıin Aqtaý porty arqyly júk konteınerlerin aýystyryp tıeý eki esege artqany belgili boldy. Sondaı-aq, Transkaspıı halyqaralyq kólik baǵyty boıynsha 2 myńnan astam jıyrma fýttyq ekvıvalentte bary aıtyldy.
