Aqtaý men Quryq porttarynyń ótkizý qabilettiligi artady

NUR-SULTAN. QazAqparat – Indýstrııa jáne ınfraqurylymdyq damý vıtse-mınıstri Parlament Májilisinde keme qatynasy týraly kelisimdi ratıfıkatsııalaý jónindegi zań jobasyn tanystyrdy, dep habarlaıdy QazAqparat tilshisi.

«Atalǵan kelisim Eýrazııalyq ekonomıkalyq odaqqa qatysýshy memleketter arasynda jasaldy. Onyń erejeleri týraly aıtar bolsam, birinshiden taraptardyń ishki sý joldary boıynsha kemelerdiń tranzıttik ótýine ruqsat berý tártibin jeńildetý kózdeledi. Atap aıtqanda, kelisimde tranzıttik ótýge arnalǵan ótinimdi qaraý merzimi – 10 kún jáne ruqsatty ýákiletti organdar beretin bolyp belgilendi. Kelisimge qatysýshy elderdiń ishinde kemelerdiń tranzıttik júzýi tek Reseıdiń ishki sý joldarymen júzege asyrylady. Qazirgi kezde tranzıttik ótýge ruqsatty Reseı Federatsııasynyń Úkimeti beredi. Osy ruqsatty alý 3 aıdan 6 aıǵa deıingi merzimdi qamtıdy», - dedi Berik Qamalıev.

Onyń aıtýynsha, negizinen júkter Qara teńiz porttarynan qazaqstandyq porttarǵa (Aqtaý, Quryq, Baýtıno, Atyraý) Volgo-Don kanaly arqyly jetkiziledi.

«Reseıdiń ishki sý joldary arqyly tek qazaqstandyq kompanııalardyń jeńildetilgen tártippen ótý múmkindigi bar. Sol sebepti qazirgi ýaqytta Eýrazııalyq odaqqa múshe emes Kaspıı mańy elderi (Ázerbaıjan, Iran, Túrikmenstan) Kaspıı porttarynan Qara teńiz porttaryna júkterdi tasymaldaý úshin qazaqstandyq tasymaldaýshylardy («Qazaqteńizkólikfloty», «OMS shipping») tartýǵa daıyn eken bildirýde. Bizdiń Aqtaý jáne Quryq porttarynyń Transkaspıı halyqaralyq kólik baǵdary boıynsha qabilettiligi artady», - dedi ol.

Vıtse-mınıstrdiń aıtýynsha kelisimdi qabyldaýdyń arqasynda Reseıdiń ishki sý joldarymen tranzıttik tasymal kólemin 2025 jylǵa qaraı shamamen 250-300 myń tonnaǵa kóbeıtý kózdelýde.