Aqtaý men Quryq porttary arqyly ótetin konteınerler sany 140 myńǵa jetkizilmek
««Nurly jol» baǵdarlamasyn júzege asyrý – bizge Kaspııde úzdik logıstıkalyq habty qalyptastyrýǵa múmkindik berdi. Búgingi tańda bizdiń Aqtaý, Quryq teńiz porttarynyń qýaty 27 mln tonnany quraıdy. Biz osyndaı mólsherdegi júkti ótkize alamyz. Atap aıtqanda Aqtaý portynan 21 mln tonna, Quryqtan 6 mln tonna júk ótedi. Olar arqyly kóbinese munaı, munaı ónimderi, bıdaı, metall, ónerkásiptik ónimder, qurylys materıaldary tasymaldanady», - dedi Berik Qamalıev Parlament Májilisinde keme qatynasy týraly kelisimdi ratıfıkatsııalaý jónindegi zań jobasyn tanystyra otyryp.
Onyń aıtýynsha, bıyl pandemııaǵa qaramastan porttardyń qarqyny saqtalǵan.
«Biz 9 aıdyń ishinde tipti 4,5 mln tonna artyq júk ótkizdik. Bul – ótken jyldyń sáıkes kezeńimen salystyrǵanda 4 paıyzǵa artyq. Jyl sońyna deıin qarqyndy saqtap qalǵymyz keledi. Alaıda bul rette teńiz porttarynyń tolyq qýatta jumys istep turmaǵanyn da atap ótý kerek. Bul - munaı óndirý kóleminiń qysqarýyna baılanysty. Mysaly 2011 jyly biz Aqtaý porty arqyly shamamen 10 mln tonna munaı jiberetinbiz. Qazir bul kórsetkish – 2 mln tonnany quraıdy. Sebebi jóneltiletin munaı kóleminiń kóbi qubyr arqyly jetkiziletin boldy. Sonymen qatar Iranǵa qatysty sanktsııalyq sharalar da óz áserin tıgizdi. Bizdegi «ArselorMıttal Temirtaý» kompanııasy jyl saıyn 2 mln tonnaǵa jýyq metall tıep jiberetin. Osyndaı faktorlar álbette óz áserin tıgizdi», - dedi ol.
Berik Qamalıev atalmysh porttardaǵy júkti «konteılendirý» jumysy júrgizilip jatqanyn jetkizdi.
«Qazirgi tańda Transkaspıı jańa halyqaralyq baǵdary boıynsha Aqtaý-Baký baǵytynda jóneltiletin 20 puttyq konteınerlerdiń sanyn 20 myńnan 40 myńǵa deıin arttyrdyq. «Qazmortransflot» kompanııasynyń júk tasymalyn 52 paıyzǵa jetkizdik. Biz «Qazaqmys», «Qazmyrysh», «Qazaqstan allıýmınııi» kompanııalarynyń júkteriniń eksportyn konteınerlindirmekpiz. 40 myń konteıner – maqsatymyzdyń shegi emes. 2025 jylǵa deıin 130-140 myń konteınerge deıin júk tasymalyn arttyrǵymyz keledi», - dedi ol.
foto:https://sk.kz/
