Aqtaý men Quryq porttary jańǵyrtylyp, Ázerbaıjannan eki keme satyp alynady

ASTANA. KAZINFORM – Kaspıı teńizi arqyly konteıner tasymalyn ulǵaıtý úshin Ázerbaıjannan eki keme satyp alynady. Kólik mınıstri Nurlan Saýranbaev Aqtaý men Quryq porttaryndaǵy kólik ınfraqurylymyn jaqsartý jumystaryn baıandady.

– Kaspıı haby boıynsha Aqtaý jáne Quryq porttaryn modernızatsııalaý jumystary júrgizilip jatyr. Jyl sońyna deıin Aqtaý portynda qytaılyq Lıanıýngan kompanııasymen birlesken konteınerlik hab qurylysynyń birinshi kezegi aıaqtalady. Joba tolyq iske asyrylǵannan keıin habtyń qýattylyǵy jylyna 240 myń konteınerge deıin jetedi, – dedi N.Saýranbaev Úkimettiń búgingi otyrysynda.

Sonymen birge, Aqtaý portynyń akvatorıasyn tereńdetý, aılaqtardy rekonstrýktsııalaý jumystary júrgizilip jatyr.

– Quryq portynda «Sarja» kópfýnktsıonaldy termınalynyń qurylysy jalǵasyp jatyr. Kaspıı teńizi arqyly konteıner tasymalyn ulǵaıtý úshin 2027 jylǵa deıin Ázerbaıjannan syıymdylyǵy 780 konteıner bolatyn eki keme satyp alý josparlanǵan. Porttarǵa baratyn temirjol jelisiniń de ótkizý qabiletin ulǵaıtý jumystary qolǵa alyndy, – dedi Kólik mınıstri.

Bul jobalardy iske asyrý Aqtaý jáne Quryq porttarynyń ótkizý qabiletin 30 mln tonnaǵa deıin jetkizedi.

Oǵan qosa 2026 jylǵa deıin Jańaózen qalasyn Túrkimenstanmen baılanystyratyn avtomobıl joldaryna kúrdeli jáne ortasha jóndeý jumystary júrgiziledi.

Aıta keteıik, Qazaqstanda 2030 jylǵa deıin 5 transshekaralyq hab ashylady.

Eldegi barlyq transshekaralyq habtar kólik ınfraqurylymymen qamtamasyz etilgen.