Aqtaý men Atyraý qalalaryn kúıiktiń ıisi jaılady

AQTAÝ. KAZINFORM – Aqtaýda 14 qazan kúni tańda barlyq shaǵyn aýdandy kúıiktiń ıisi jaılap, turǵyndardy alańdatty. Biraq Mańǵystaý oblystyq tótenshe jaǵdaılar departamentiniń habarlaýynsha, óńirde qandaı da bir órt oqıǵasy tirkelmegen.

Al Ekologııa departamenti kúıiktiń ıisi Atyraý oblysynda janyp jatqan qamystyń saldarynan ekenin, Aqtaýǵa jel arqyly kelgenin jetkizdi.

Eske salaıyq, 7 qazanda Atyraýda kúıiktiń ıisi shyqqan bolatyn. Sol kezde tútinniń Atyraýdan Kaspıı teńizine qaraı 20 shaqyrym jerde bolǵan órttiń saldarynan shyqqany anyqtaldy. Atyraý oblystyq tótenshe jaǵdaılar departamentiniń málimetinshe, 12 qazanda saǵat 15:00-de aldyn ala janý alańy shamamen 60 gektar bolǵan. Onyń 55 gektar aýmaǵynda órt sóndirilip, qalǵan 5 gektar jerde órtti óshirý jumystary jalǵasyp jatyr.

Buǵan deıin Atyraý oblysynda 18 gektar aýmaqta qamys pen qopa áli byqsyp jatqanyn jazǵan bolatynbyz.