«Aqtaý mektepterinde jappaı qantógis bolady» degen jelidegi jazba tekserilip jatyr
AQTAÝ. KAZINFORM – Mańǵystaý oblysynda turǵyndardyń WhatsApp chattarynda bilim berý mekemelerine jasalatyn shabýyl týraly qorqytý sózder jazylǵan habarlamalar taratylýda.
Polıtsııa departamenti bul habarlamalardyń taralý kózin anyqtap, áleýmettik jelilerdegi aqparat boıynsha tekserý jumystary júrgizilip jatqanyn jetkizdi.
- Qurmetti turǵyndar! Messendjerlerde mektepterde terrorıstik aktiler josparlanyp jatyr degen jalǵan aqparat taraýda. Azamattardan osyndaı tekserilmegen habarlamalarǵa senbeýdi jáne olardy taratpaýyn suraımyz. Qazirgi ýaqytta polıtsııa tekserý jumystaryn júrgizip jatyr, qaýipsizdik sharalary kúsheıtildi. Jaǵdaı tolyǵymen baqylaýda, - delingen habarlamada.
Sonymen qatar, polıtsııa departamenti terrorıstik aktiler týraly jalǵan habar taratý úshin 5 jylǵa deıin bas bostandyǵynan aıyrý jazasy kózdelgenin eske salyp, tek resmı aqparatqa senýge shaqyrdy.
Al Mańǵystaý oblysynyń bilim basqarmasy áleýmettik jelilerde taraǵan aqparatqa baılanysty polıtsııa tarapynan tıisti tekserý jumystary júrgizilgenin jetkizdi. Nátıjesinde tizimde kórsetilgen bilim berý uıymdarynyń ǵımarattary qaýipsiz ekeni rastalyp, arnaıy aktiler berilgen.
- Osyǵan oraı, 2025 jylǵy 10 qarasha kúni Aqtaý qalasyndaǵy barlyq mektepterde oqý protsesi shtattyq rejimde, sabaq kestesine sáıkes ótedi.
Bilim berý uıymdarynda eshqandaı qaýip-qater joq, turǵyndarǵa alańdaýǵa negiz joq. Oqýshylardyń qaýipsizdigin qamtamasyz etý maqsatynda ár mektepte ýchaskelik polıtsııa qyzmetkerleri kezekshilik atqarady, - dep jazdy vedomstvodan.
Buǵan deıin, UQK túrmedegi adam terrorlyq akt jasaýǵa daıyndalǵanyn habarlaǵan bolatyn.