Aqtaý mektebinde muǵalimder dálizde jumys isteýge májbúr
1648 orynǵa eseptelgen mektepte 3300-ge jýyq oqýshy 3 aýysymmen bilim alady. Jalpy Mańǵystaý oblysynda mundaı 21 mektep bar. Oqý kabınetteriniń jetispeýshiliginen muǵalimder kez kelgen buryshta otyryp, qyzmettik qujattardy toltyrýǵa májbúr. Kezinde qosalqy sharýashylyq úshin qoldanylǵan bólmeler de qazir oqý kabınetterine aınalǵan.
«Bizde qazir muǵalimder bólmesi joq. Shyǵarmashylyq jumystarymyz bar, dápter tekserý degen sııaqty úrdisterdi dáliz boıynda, bosaǵan kabınetterdi qarap júrip jasaımyz. Árıne, munyń barlyǵy qıynshylyq keltirip jatyr. Soǵan qaramastan jumysymyzdy jalǵastyryp jatyrmyz», - dedi mektep muǵalimi Raýshan Abılova.
«Balalar shaǵynaýdandarmen birge, eldi mekenderden de keledi. Bizge jaqyn ornalasqan Munaıly aýdanynan da kelip oqyp jatyr. Sondaı-aq Túpqaraǵan aýdanynyń Telman jáne Aqshuqyr eldi mekenderinen de kelip oqıdy. Sonda 900-ge tarta bala syrttan kelip, bilim alyp jatyr», - dedi mektep dırektorynyń mindetin atqarýshy Orynbasar Naýryzbaev.
Mektep 28-shaǵynaýdanda ornalasqan. Oǵan irgeles jańadan salynǵan yqshamaýdandarda orta bilim mekemesi joq. Sondyqtan turǵyndar balalaryn osynda ákeledi.
Jaýapty mamandar óńirde 2025 jylǵa deıin 20 mektep salynsa, másele birshama sheshiletinin aıtady.
«Qazirdiń ózinde Aqtaý qalasynda 4 mektep salynyp jatyr. Munaıly aýdanynda árqaısysy 1200 oryndyq 2 mektep boı kóterýde. Sonymen qatar bıyl Aqtaý qalasynda 1 mektep ashyldy. Jaqyn arada Munaıly aýdanynan taǵy bir jańa mektep paıdalanýǵa beriledi», - dedi Mańǵystaý oblystyq Bilim basqarmasy basshysynyń orynbasary Gúlmıra Mamaeva.
Aıta keteıik, búginde Mańǵystaý óńirinda 2 mektep apatty jaǵdaıda tur. Biri Jańaózende, ekinshisi Beıneý aýdany Sam aýylynda ornalasqan.
Vıdeodan alynǵan kadr